Manvel Qriqoryan gizlin ekspertizaya aparılıb

Ermənistanın müdafiə nazirinin sabiq müavini, keçmiş deputat, general Manvel Qriqoryan növbəti dəfə məhkəmə-tibbi ekspertizasından keçib. Yekun rəyin verilməsi isə bir qədər vaxt tələb edəcək.

1news.az xəbər verir ki, bu barədə “Qraparak” nəşri yazıb.

Məlumata görə, generalın həkimləri və yaxınları hər şeyi mümkün qədər səssiz ediblər ki, onun həbsdən azad olunmasına etiraz edənlər mane olmasınlar.

Qriqoryanı müayinə edən həkim Artak Manukyan deyib ki, yekun ekspertiza rəyindən sonra çətin ki, onun barədə məhkəmə qərarı dəyişsin. Həkimin sözlərinə görə, onun şişləri  böyüyüb.

Generalı daha əvvəl müayinə edən onkoloq-həkim  Norbert Avetyan onu Fransaya göndərməyi tövsiyə edir. Ancaq xəstə istintaq altındadır və ölkəni tərk etməsi qadağandır.

Qeyd edək ki, ağciyər xərçəngindən əziyyət çəkən Qriqoryanı İrəvan məhkəməsi dekabrın 21-də 25 milyon dram (təxminən 51,5 min dollar) girov müqabilində azadlığa buraxıb.

Bundan dərhal sonra Eçmiədzində etiraz aksiyaları başlayıb, onun yenidən həbsi tələb olunub. Aksiyalar İrəvanda da davam etdirilib.

Dekabrın 24-də isə Ermənistan Baş Prokurorluğu qərara etiraz edib. Vəkilləri Qriqoryanın ağır xəstə olduğunu bildirirlər.

Qriqoryan deputat toxunulmazlığı ləğv edildikdən sonra həbs edilib. O, qanunsuz silah saxlamaqda, başqasının əmlakını ələ keçirməkdə, hərbçilər üçün nəzərdə tutulmuş ərzağın mənimsənilməsində ittiham olunur.

P.Sultanova