Yeni deputatların adları açıqlanıb: Parlament Paşinyan qohumlarından və dostlarından ibarət olacaq

Ermənistanın Mərkəzi Seçki Komissiyası ölkənin yeni seçilmiş parlamentinin üzvlərinin siyahısını açıqlayıb.

1news.az xəbər verir ki,  yayılmış məlumatlara görə, baş nazir vəzifəsini icra edən Nikol Paşinyanın "Mənim addımım" siyasi blokundan Ermənistanın qanunverici orqanına onun xeyli yaxın dostları və qohumları keçib.

Belə ki, Paşinyan blokunun fraksiyanın siyahısında onun həyat yoldaşı Anna Akopyanın qardaşı Qraçya Akopyan, Paşinyanın qardaşı oğlu Sipan Paşinyan, uşaqlıq dostu Vaqe Qalumyan,  həmçinin dostunun oğlu Akop Simidyan və mühafizəçisi Ayk Sarkisyan da var.

Bundan əlavə, Paşinyan blokunun fraksiyasının tərkibinə Ermənistanın dövlət əmlak komitəsinin rəhbərinin həyat yoldaşı Lena Nazaryan, ləğv edilmiş diaspor nazirliyinin sabiq rəhbəri Mxitar Ayrapetyan da  daxildir.

Siyahıda keçmiş hakim partiyanın Paşinyanın tərəfinə keçmiş bir neçə üzvü də var.

Erməni parlamentində oliqarx, “Çiçəklənən Ermənistan” partiyasının qurucusu Qaqik Tsarukyanın mühafizəçisi də təmsil olunacaq.

Qeyd olunub ki, seçilmiş deputatların arasında ölkənin fəal siyasi və ya ictimai həyatında heç vaxt görməmiş, tanınmayan çox saylı şəxslər var.

Ermənistanda növbədənkənar parlamenti seçkiləri ötən il dekabrın 9-da keçirilib.

P.Sultanova