1in.am: Koçaryan cinayətkardır

Biz Robert Koçaryanın 2008-ci il 1mart qanlı cinayətinin təşkilatçısı olduğunu iddia etməkdə davam edirik. Təbii ki, saytda heç bir təkzib verilməyəcək.

1news.az xəbər verir ki, bu barədə 1in.am saytında dərc edilmiş açıqlamada deyilir.

Xatırladaq ki, dünən İrəvanın ümumi yurisdiksiyası məhkəməsi həbsdə olan sabiq prezident Robert Koçaryanın 1in.am saytına qarşı iddiasını təmin edib. Məhkəmə 4 məqalə ilə bağlı saytın təkzib verib, Koçaryandan üzr istəməsinə dair qərar çıxarıb.

Həmçinin, sayt Koçaryana təzminat kimi 400 min dram (təxminən 852 dollar) ödəyəcək. 

Təkzib və üzrxahlıq məhkəmə qərarı qüvvəyə mindikdən sonra iki gün ərzində dərc edilməlidir.

“Əminik ki, istintaq və məhkəmə prosesləri zamanı bizim bütün dərc etdirdiklərimiz təsdiq olunacaq. Robert Koçaryan cinayətkardır və biz əlləri qanla boyanmış birindən üzr istəməyəcəyik.

Bundan əlavə, sayt davamlı şəkildə 27 oktyabr cinayətinin tam aşkarlanmasını izləyəcək, əminik ki, Robert Koçaryan və Rusiya imperiyası bu cinayətin əsas benefisiarlarıdır.

Koçaryanın hakimiyyətinin qanlı on ilində Ermənistanın xalqının etimadını qazanaraq mandat almış şəxslər parlament binasında güllələndi, İrəvanın küçələrində isə ən azı on dinc vətəndaş öldürüldü.

27 oktyabr və 1 mart tarixləri Robert Koçaryanın adı ilə bağlıdır və o, törətdiyi cinayətlərə görə məhkum olunacaq. Bu, bizim birinci instansiya məhkəməsinin qərarına cavabımızdırdır", deyə saytın açıqlamasında qeyd edilib.

P.Sultanova