Rusiyalı senator iclas zalında həbs edildi – TƏFƏRRÜAT
Senator Rauf Araşukov Rusiya Federasiya Şurasının toplantısı zamanı iclas zalında həbs olunub.
1news.az-ın Report-a istinadən verdiyi xəbərə görə, onun adı "Adıge-Xase" Gənclər Hərəkatının sədri, 36 yaşlı Aslan Jurkovun qətlində hallanır.
2010-cu ilin martında A.Jurkov yaşadığı evin qarşısında güllələnib. R.Araşukov gənclər hərəkatı sədrinin ölümündə əlinin olması ittihamını rədd edir.
Qeyd edək ki, 32 yaşlı R.Araşukov Qaraçay-Çərkəz Respublikasından senator seçilib. R.Araşukov təbii qaz sənayesinin tanınmış sahibkarı Raul Turkbiyeviç Araşukovun oğuludur.
Bu arada senator Rauf Araşukovun həbs edilməsinin təfərrüatı məlum olub.
Şuranın iclası əvvəlcə mətbuat üçün açıq keçirilirmiş və canlı yayımlanırmış. Lakin sonradan Rusiya Federasiya Şurasının sədri Valentina Matviyenko toplantını bağlı elan edib və yayım dayandırılıb. Bundan sonra Rusiyanın baş prokuroru Yuri Çayka İstintaq Komitəsinin sədri Aleksandr Bastrıkinlə birlikdə zala daxil olaraq, Rauf Araşukovun senator kimi toxunulmazlığının ləğv edildiyi barədə qərarı oxuyub.
Bundan sonra senator iclas zalından qaçmaq istəyəndə prosesə Federasiya Şurasının sədri V.Matviyenko müdaxilə edib. O, sərt səs tonu ilə R.Araşukovu müqavimət göstərməməyə çağırıb.
Qeyd edək ki, R.Araşukov 1986-cı il iyulun 23-də Stavropol diyarı, Qaraçay-Çərkəz Muxtar Dairəsinin Xabez aulunda anadan olub. 18 yaşında Satavropol şəhərinin deputatı seçilib. Qaraçay-Çərkəzin Prezidenti Mustafa Batdıyev 2008-ci ildə 22 yaşlı R.Araşukovu muxtar dairənin əmək və sosial inkişaf naziri təyin edib.
2008-ci ildə respublika prezidentinin köməkçisi olub. 2010-cu ildən "Vahid Rusiya" Partiyasının dəstəyi ilə Qaraçay-Çərkəz Xalq Məclisinin deputatı seçilib. Həmin ilin aprelində deputat mandatından imtina edib.
R.Araşukov 2010-2011-ci illərdə "Qazprom"un Pyatiqorsk regionlararası filialının direktor müavini vəzifəsində çalışıb. 2011-ci illərdə Qaraçay-Çərkəz baş nazirinin birinci müavini təyin edilib. Eyni zamanda "QÇR ərazisində Federal Avtomobil Yolları"nı idarə edib.
O, 2016-cı ildən Federasiya Şurasının üzvü (senator) seçilib. 2018-ci ildə Birləşmiş Ərəb Əmirliyi sənədləri saxtalaşdırmaqda ittiham edərərk, ona qarşı cinayət işi başlayıb.
1news.az
