Ruhani: İran Ermənistana qaz tədarükünün artırılmasına hazırdır

İran Ermənistana qaz tədarükünün artırılmasına hazır olduğunu bildirib.

1news.az erməni mətbuatına istinadla xəbər verir ki, bu barədə İran prezidenti Həsən Ruhani Ermənistanın baş naziri Nikol Paşinyanla görüşdə bəyan edib.

Bu qaz Ermənistanın istilik elektrik stansiyalarında istifadə olunur. Beləliklə, yeni qaz tədarükü Ermənistanla İran arasında bu sahədə barterin genişləndirilməsinə imkan verəcəkdir. İran tərəfi qazın Gürcüstana Ermənistandan tranzit üçün üçtərəfli əməkdaşlığı müzakirə etməyə hazır olduğunu bəyan edib.

Enerji sektorunda əməkdaşlıq perspektivli olaraq qalır. Burada İran-Ermənistan-Gürcüstan-Rusiya enerji dəhlizinin imkanları nəzərdən keçirilir. Bu qarşılıqlı fəaliyyət haqqında memorandum 2015-ci ildə imzalanıb. Araks çayında yerləşən Meqri hidroelektrik stansiyasının tikintisi də müzakirə olunub.

Başqa bir məsələ Ermənistan vasitəsilə Fars körfəzindən qara dənizə nəqliyyat dəhlizi ilə bağlı olub.

"Qeyd etmək lazımdır ki, hər iki ölkədə münasibətlərin inkişafı üçün böyük potensial və iradə mövcuddur. Biz məsul şəxslərə bütün bu məsələlər hökumətlərarası komissiyanın iclasına kimi müzakirə etməyi tapşırmışıq”, - Ruhani deyib.

İran prezidenti qeyd edib ki, iki ölkə Ermənistanın müstəqilliyi günündən bəri yaxşı qonşuluq münasibətlərini saxlayır. O, bu əlaqələrin yeni hökumət çərçivəsində inkişaf edəcəyinə əminliyini ifadə edib.

“Baş nazir ilə görüşdə biz İrana qarşı əsassız sanksiyalar məsələsində Ermənistanın mövqeyindən məmnun qaldıq. İki ölkəmizin məqsədi qarşılıqlı maraqlarla əlaqələrin inkişaf etdirilməsi və üçüncü bir ölkənin bu əməkdaşlığa müdaxilə etməsinə imkan verməməkdir ", - Ruhani deyib.

P.Sultanova