Koçaryan: Azərbaycan Prezidenti Paşinyanı məğlub edib

Ermənistanın baş naziri Nikol Paşinyan bütün vasitələrlə Qarabağ probleminin həlli üzrə danışıqlar aparıldığını gizlətməyə çalışır.

1news.az erməni mətbuatına istinadla xəbər verir ki, bu barədə həbsdə olan Ermənistanın ikinci prezidenti Robert Koçaryan müsahibəsində bildirib.

"Cəmiyyətə hələ ki Qarabağ münaqişəsinin nizamlanması üzrə hakimiyyət orqanlarının mövqeyi açıqlanmayıb və bu da narahatlıq doğurur. Mövqeyi konkretləşdirmədən necə uğurlu danışıqlar aparmaq olar?

Qarabağ münaqişəsinin həllində bir sıra əsas prinsiplər var ki, onlarla bağlı danışıqlara başlamazdan əvvəl hakimiyyət dəqiq yanaşmalara malik olmalıdır”, Koçaryan əlavə edib.

O hesab edir ki, Azərbaycan Prezidenti İlham Əliyev Paşinyanı məğlub edib:

“Düşənbədə "lift danışıqları" təmas xəttində etimad tədbirlərinin artırılması üçün Ermənistan tərəfinə əlverişli olan Vyana və Sankt-Peterburq razılaşmalarını dəfn etdi.

Belə hərəkətlərin səbəbinin nə olmasından asılı olmayaraq bu, bacarıqsızlıqdır. Hər iki halda da bu böyük bir səhvdir. Düşünürəm ki, Minsk qrupunun növbəti təklifləri xoşagəlməz olacaq”.

Koçaryan harda olmasına baxmayaraq Azərbaycanın işğal edilmiş torpaqlarını azad  etmək cəhdlərinə müdaxilə edəcəyini deyib.

P.Sultanova