Ermənistanda polis etirazçılara güc tətbiq edib, təxribat törədib
Ermənistanın İcəvan rayonunda polis etirazçılara qarşı qanunsuz hərəkətlər edib. Həmçinin, saxlanılan şəxslərin sayı rəsmi açıqlanan rəqəmlərdən daha çoxdur.
1news.az erməni mətbuatına istinadla xəbər verir ki, bu barədə İcəvanda qarşıdurma zamanı saxlanılan şəxslərin yaxın qohumları bildiriblər.
Onlar hüquq-mühafizə orqanları əməkdaşları tərəfindən təxribata əl atıldığını da bəyan ediblər.
"Mülki geyimli polislər evimizə basqın edərək və güc tətbiq etməklə oğlumu demək olar ki, çılpaq vəziyyətdə, tək alt paltarı ilə apardılar”, deyə qadınlardan biri deyib.
Saxlanılan etirazçıların valideynləri övladlarının harada olduğunu bilmədiklərini deyiblər. Onların sözlərinə görə, saxlanılan bütün etirazçıların ağacların qanunsuz kəsilməsini davam etdirməyi tələb etməsinə dair yayılan məlumatlar yanlışdır:
"Biz ağacın quru budaqları və kötüklərini toplamağa imkan verən sənədləri təqdim etmələrini xahiş etdik".
Aksiya iştirakçıları, həmçinin polis tərəfindən onların bədənlərinə yetirilmiş xəsarətləri, qançırları, sıyrıntıları nümayiş etdiriblər. Onlar bildiriblər ki, xəsarət alanların sayı daha çoxdur, lakin həkimə hər kəs müraciət etməyib.
Bu gün səhərdən İcəvan polis idarəsinin binası qarşısına yığışan qadınlar bildiriblər ki, aksiya zamanı polisə daş atalnlar mülki geyimdə polis məmurlarının özləri olub.
Xatırladaq ki, dünəndan başlayaraq bir qrup şəxs Gürcüstan ərazisinə gedən dövlətlərarası əhəmiyyət kəsb edən yolu bağlayıblar. Onlar ağacların kəsilməsinə qoyulan qadağaya etiraz ediblər.
P.Sultanova
