Vüqar Bayramov: Bu güzəştlər sahibkarların fəaliyyətini tez bir zamanda bərpa etməsinə imkan verəcək
Nazirlər Kabinetinin 2020-ci il 4 aprel tarixli sərəncamı ilə təsdiq edilmiş Tədbirlər Planına əsasən, pandemiyadan zərər çəkən sahələrdə fəaliyyət göstərən sahibkarlıq subyektlərinə vergi güzəştləri və tətillərinin verilməsi nəzərdə tutulur.
Vergi güzəştləri və tətilləri ilə bağlı təkliflər paketi koronavirus (COVID-19) pandemiyasının milli iqtisadiyyata mənfi təsirlərinin qiymətləndirilməsi məqsədilə yaradılmış İşçi Qrup çərçivəsində dövlət qurumları, sahibkarların ictimai təşkilatları, o cümlədən Sahibkarlar (İşəgötürənlər) Təşkilatları Milli Konfederasiyası, Azərbaycan Banklar Assosiasiyası, həmçinin Kiçik və Orta Biznesin İnkişafı Agentliyinin (KOBİA) xətti ilə ayrı-ayrı sektorlar üzrə fəaliyyət göstərən sahibkarlıq subyektləri ilə geniş müzakirə olunub.
Bununla əlaqədar, İqtisadiyyat Nazirliyi tərəfindən Vergi Məcəlləsi və “Sosial sığorta haqqında” Qanuna zəruri dəyişikliklərlə bağlı təkliflər hazırlanıb. Hökumətdə bir daha baxıldıqdan sonra təkliflər paketinə daxil olan sənəd layihələri Milli Məclisə təqdim olunub.
Məsələ ilə bağlı 1news.az-a danışan Milli Məclisin deputatı Vüqar Bayramov deyib ki, hökumət tərəfindən təklif edilən iqtisadi paket həm pandemiya, həm də postpandemiya dövründə sahibkarların dəstəklənməsini nəzərdə tutur.
“Bu baxımdan vergi güzəştlərinin təklif olunması pandemiya, xüsusən postpandemiya dövründə sahibkarlara belə güzəşstlərdən etməklə həm xərclərini minimumlaşdırmaq, həm də iqtisadi aktivliyi qısa zamanda bərpa etmək imkanı verəcək. Nəzərə alsaq ki, güzəştlər mikro sahibkarlıq subyektləri daxil olmaqla praktik olaraq bütün sahibkarlıq subyektlərini əhatə edir. Sadələşdirilmiş vergi subyektləri üzrə vergi dərəcələrinin iki dəfə azaldılması həyata keçirilir, eləcə də sahibkarlar üçün mənfəət və gəlir vergisinə 75 faizlik güzəşt tətbiq edilib. Digər tərəfdən torpaq və əmlak vergisində müddətli var".
Deputat deyib ki, praktik olaraq güzəştlərin strukturuna və güzəştinə diqqət yetirən zaman görərik ki, bu güzəştlər sahibkarların öz fəaliyyətlərini daha qısa zamanda postpandemiya dövründə bərpa etməsinə imkan verəcək.
“Məqsəd iqtisadi aktivliyin daha qısa zamanda əldə olunmasına nail olmaqdır. Vergi güzəştləri əslində dövlətin dolayı maliyyə dəstəyi kimi də qiymətləndirilə bilər. Çünki bu zaman sahibkar hesabladığı vergini büdcəyə ödəmir, öz sərəncamında saxlayır. Təbii ki, bu da onun fəaliyyətini genişləndirməsinə imkan yaradır. Bu baxımdan ölkə prezidentinin tapşırığına uyğun olaraq postpandemiya dövründə sahibkarlar dövlət dəstəyindən daha çox faydalana biləcəklər. Yeni vergi güzəştlərinin tətbiq edilməsi, iqtisadiyyatın leqallaşdırılması və daha liberal iqtisadiyyatın formalaşması və bütövlükdə bu kontekstdən postpandemiya dövründə Azərbaycanda yeni iqtisadi modelin tətbiq ediləcəyindən xəbər verir”.
Qafar Ağayev
