Vətən müharibəsinin 1 ayı Ermənistanın siyasi intiharı ilə müşaiyət olunur
Vətən müharibəsinin 1 ayı tamam olur. Sentyabrın 27-də düşmənin təxribatlarına cavab olaraq əks hücum əməliyyatına başlayan Azərbaycan Ordusu öz ərazilərini işğaldan azad edərək tarix yazır.
Son bir ayın yekununa nəzər salsaq, istər siyasi, istisadi, istərsə də hərbi sahədə balans Azərbaycanın xeyrinədir. Azərbaycan 1 ay ərzndə onsuz da öz xeyrinə olan balansı müsbət istiqamətə dəyişməklə öz mövqelərini daha da möhkəmləndirməkdədir. 27 ildir, Ermənistanın destruktiv, beynəlxalq birliyin isə ikili standartlar siyasəti ucbatından icra olunmayan BMT Təlükəsizlik Şurasının 822, 853, 874 və 884 saylı qətnamələrini Azərbaycan 1 ay ərzində icra etməkdədir. Cəbrayıl, Füzuli, Zəngilan, Qubadlı şəhərləri, Hadrut, Ağbənd, Mincivan qəsəbələri, 165-dən çox kənd, Murovdağ zirvəsi daxil olmaqla, bir sıra strateji yüksəkliklər cəmi 1 ay ərzində azad edilib. Azərbaycan son 1 ayda 30 ilə yaxındır davam edən “status-kvo”nu darmadağın etdi. Artıq təmas xətti və “status-kvo” yoxdur. Bu, o deməkdir ki, son 1 ayda məhz Azərbaycanın hərbi-siyasi gücü hesabına regionda yeni geosiyasi reallıq yaranıb və bütün şərtləri artıq Azərbaycan diktə edir.
1 ay həm də Ermənistanın siyasi-diplomatik cəbhədə məğlubiyyəti ilə müşaiyət olunmaqdadır. Belə ki, üçüncü tərəfi münaqişəyə cəlb etmək cəhdi iflasa uğrayan Ermənistan üzvü olduğu Kollektiv Təhlükəsizlik Müqaviləsi Təşkilatından gözlədiyi dəstəyi ala bilmədi. Xüsusilə Rusiya prezidenti Vladimir Putinin mövcud vəziyyətdə KTMT-nin öhdəlikləri ilə bağlı ünvanlanan suala cavab olaraq, “döyüş Ermənistan ərazisində aparılmır” söyləməsi işğalçının təkləndiyinin ən bariz göstəricisi idi. Cəmi 1 aya döyüş meydanında məğlub duruma düşən və beynəlxalq güclərdən yardım diləyən işğalçı ölkənin yeganə “qazanc”ı humanitar atəşkəs oldu. Lakin təcavüzkar burda da ziddiyyətli siyasətindən əl çəkməyərək, hər 3 humanitar atəşkəsi mülki əhalini hədəfə almaqla özü pozdu, bununla da beynəlxalq hüququ kobud şəkildə pozan tərəf kimi özünü ifşa etdi. 1 ay ərzində təkcə hərbi infrastrukturun məhvi Ermənistan iqtisadiyyatına azı 3 milyard dollar ziyan vurub.
Daxildə baş verəcək sosial partlayışı nəzərə alaraq, Paşinyan höküməti canlı qüvvəsinin itkilərini saymaqdan da boyun qaçırır. Belə ki, düşmən ölkə döyüş meydanında qalan hərbçilərin cəsəsdlərini götürməkdən imtina edib. Bu yanaşma onsuz da xaotik vəziyyətdə olan Ermənistan ordusunda mövcud ruh düşkünlüyünün daha da artmasına səbəb olub. Ermənistan ordusunun hərbçiləri arasındakı nizam-intizamsızlıq, fərarilik halları, zabit-əsgər qarşıdurması pik həddə çatıb. Cəmiyyətdə dövlətə və orduya inamsızlıq gənclərin zorən könüllü qismində cəbhəyə göndərilməsi, hərbi xidmət yaşına çatan şəxslərin ordudan yayınmaq məqsədilə “COVİD-19” testini müsbət yazdırması kimi faktlar Ermənistanın son 1 ayda düşdüyü acınacaqlı durumun aydın mənzərəsidir. İşğalçı ölkədən fərqli olaraq, Azərbaycan cəmiyyəti istər ön cəbhədə, istərsə də arxa cəbhədə yalnız böyük qələbəyə köklənib. Azərbaycan əsgəri işğaldan azad olunan ərazilərimizdə üçrəngli bayrağımızı dalğalandırmaqla tarix yazır, çörək və silah çatışmazlığından gileylənən erməni əsgərinin isə öz postunu tərk edib qaçmaması üçün qolları qandallanır. Çünki Ali baş Komandan İlham Əliyevin də söylədiyi kimi, Azərbaycan əsgəri öz ərazi bütövlüyü uğrunda mübarizə aparır.
Bir ay ərzində vəziyyətin necə və kimin xeurinə dəyişdiyini görmək üçün daha bir fakta nəzər salmaq vacibdir. Belə ki, Azərbaycan Prezidenti öz doğma xalqına işğaldan azad olunan ərazilərlə bağlı müjdə xəbəri çatdırır, Ermənistan rəhbərliyi isə orduda canlı qüvvə çatışmazlığı səbəbindən qadınları səfərbər olmağa çağırır.
Azərbaycan son 1 ayda Ermənistanın informasiya cəbhəsindəki mövqelərini də darmadağın edib. Ermənistan 1 ay ərzində informasiya cəbhəsində də iflic vəziyyətə düşüb. Prezident İlham Əliyevin dünyanın nüfuzlu KİV-lərinə intensiv müsahibələri, bəzi hallarda qərəzli suallara yüksək peşəkarlıqla əsaslı arqumentləri Azərbaycan həqiqətlərinin bəyan edilməsi, eyni zamanda Ermənistanın terrorçu siyasətinin ifşasını daha da dərinləşdirir. İşğalçı ölkənin baş naziri Nikol Paşinyan, eləcə də digər rəsmi şəxslər isə dünya KİV-lərinin sualları qarşısında rəzil və acınacaqlı duruma düşməkdə davam edirlər.
Vətən müharibəsi davam edir. Heç bir qüvvə bizi haqq işimizdən döndərə bilməz. Ali baş Komandanın da bəyan etdiyi kimi, biz düşməni sona qədər qovacağıq. Sadəcə, düşmən son 1 ayın nəticələrinə baxıb qərar verməlidir… Paşinyan və ölkəsinin xilası uduzmuş generallarda yox, işğal siyasətindən əl çəkməkdədir. Vaxt gedir....
Könül Nurullayeva, Milli Məclisin deputatı
