Qırğızıstan və Tacikistan münaqişənin həllinə dair bəyanat imzalayıblar
Qırğızıstan-Tacikistan sərhədində Tacikistan sərhədçiləri ilə Qırğızıstan vətəndaşları arasında qarşıdurmada baş verib.
1news.az-ın məlumatına görə, münaqişə nəticəsində 20 Qırğızıstan vətəndaşı həyatını itirib, hər iki tərəfdən 150 nəfər yaralanıb. Bu ölkənin Səhiyyə Nazirliyinin məlumatına görə, yaralılardan 25-i xüsusi təyyarə ilə Batkendən Bişkekə aparılıb. Onlar Bişkek Tədqiqat Travmatologiya və Ortopediya Mərkəzində, Milli Xəstəxanada və Milli Cərrahiyyə Mərkəzində yerləşdiriliblər. Yaralılardan ikisinin vəziyyəti ağır, qalanlarının vəziyyəti isə orta ağır və nisbətən qənaətbəxş kimi qiymətləndirilir.
Qırğızıstan münaqişə bölgəsindən 13.5 min nəfər vətəndaşını təxliyə edib.
Hazırda insidentin səbəbləri ilə bağlı araşdırma aparılır.
Bu arada, Qırğızıstan və Tacikistan Batken və Suğd vilayətlərinin sərhəd bölgələrindəki silahlı münaqişənin həllinə dair bəyanat imzalayıblar.
Trend-in "Kabar"a istinadən verdiyi məlumata görə, bəayantda bildirilir ki, tərəflərin təşəbbüsü ilə yaradılmış komissiya sərhəddəki hadisənin səbəblərini və nəticələrini müzakirə edib.
Müzakirələrin yekunları üzrə tərəflər bir sıra məsələlər üzrə razılığa gəliblər:
- silahlı münaqişənin dayandırılması;
- şəxsi heyəti və hərbi texnikanı daimi yerlərinə qaytarmaq;
- gərginliyin artmasının qarşısını almaq üçün tədbirlər görmək;
- planlaşdırılan tədbirlərin tam icrası üçün iki ölkənin hüquq-mühafizə orqanlarının əməkdaşları və icra hakimiyyəti orqanlarının əməkdaşlarından birgə işçi qrupu yaratmaq;
- iki dost xalqın və dövlətin mənafeyi naminə səmərəli danışıqlar prosesi üçün müvafiq sabitləşdirici şərait yaratmaq.
1news.az
