“Bir sıra qüvvələr Azərbaycan-Türkiyə münasibətlərinə xələl gətirməyə çalışır” – Deputat

"Şuşa ilə bağlı qanun layihəsinin hazırlanması sevindiricidir. Hətta bu yaxınlarda Türkiyənin tanınmış siyasi xadimi Dövlət Baxçalı Şuşada məktəb tikmək istədiyini bildirmişdi".

1news.az xəbər verir ki, bunu Milli Məclisin iclasında çıxış edən deputat Fazil Mustafa bildirib. Deputat qeyd edib ki, bir sıra qüvvələr Türkiyə-Azərbaycan münasibətlərinə xələl gətirmək üçün addımlar atır.

"Bəzi ölkələrin informasiya vasitələrindən istifadə edərək münasibətləri pozmağa çalışırlar. Hətta Dövlət Baxçalı sonra açıqlama verdi ki, bu məktəb inşa olunmayacaq və yığılan vəsait qaytarılacaq. Dövlət Baxçalının Şuşada məktəb tikməklə bağlı təklifi çox yaxşıdır. Bununla bağlı Azərbaycan tərəfi dərhal cavab verdi və məktəbin inşa olunacağı bildirildi.

Biz elə etməliyik ki, kimsə bizim dostluğumuza müdaxilə edə bilməsin. Türkiyə şirkətlərinin bu bölgədəki fəaliyyətinə şərait yaradılmalıdır. Türkiyə şirkətlərinə yaradılan şərait Azərbaycan şirkətlərinə yaradılan şəraitlə eyni olmalıdır. Düşünürəm ki, Türkiyə şirkətlərinin fəaliyyətinə əngəl törədənlər sərt cəzalandırılmalıdır".