Könül Nurullayeva: Sərhədlərin delimitasiya və demorkasiyası prosesinə heç kim mane ola bilməz
Ermənistanın sərhəddə törətdiyi təxribatlar ilk növbədə 10 noyabr 2020-ci ildə imzalanmış üçtərəfli bəyanatın kobud şəkildə pozulmasıdır. Bu, revanşizm cəhdidir, amma revanşizmin Ermənistana baha başa gələcəyi aydındır.
Ali Baş Komandanın da hər zaman bəyan etdiyi kimi, dəmir yumruq yerindədir. Burada təbii ki, sülhməramlıların fəaliyyətindəki boşluqlar da diqqətdən kənarda qalmamalıdır. Rusiya sülhməramlı qüvvələri üçtərəfli bəyanatın müddəalarına uyğun olaraq müvəqqəti dislokasiya olunduqları Azərbaycan ərazilərində Ermənistan silahlı qüvvələrinin yerləşdirilməsi hallarına son qoymalıdır. Azərbaycan Müdafiə Nazirliyinin rəsmi məlumatında da qeyd olunduğu kimi, 10 noyabr 2020-ci ildə imzalanmış üçtərəfli bəyanata uyğun olaraq, Ermənistan silahlı qüvvələrinin qalıqlarının tam şəkildə sülhməramlı qüvvələrin müvəqqəti yerləşdirildiyi Azərbaycan ərazilərindən çıxarılması təmin olunmayıb.
Eyni zamanda Ermənistanın qanunsuz şəkildə öz silahlı qüvvələrinin şəxsi heyətini Azərbaycan ərazilərinə daşıması, Muxtarkənd, Şuşakənd məntəqələri yaxınlığında, eləcə də Kəlbəcər və Laçın rayonlarının inzibati hüdudlarının şərq istiqamətindəki ərazilərdə yeni erməni postlarını qoyması istər hüquqi, istərsə də siyasi baxımdan yolverilməzdir. Bu, Ermənistana baha başa gələcək. Ermənistan bununla sərhədlərin delimitasiya və demorkasiyasına mane olmağa çalışır. Paşinyan sərhəd insidentləri hesabına dünya birliyinin dəstəyinə nail olmağa can atır. Amma Azərbaycan postmünaqişə hədəflərini yerinə yetirir.
Bu prosesə heç kim mane ola bilməz. Hazırda Ermənistan sərhəd məsələsində Rusiyadan dəstəyə ümid edir. Amma Kreml rəsmiləri əsas diqqəti kommunikasiyaların açılmasına yönəldir. Kommunikasiyaların açılması isə paralel aparılmalıdır. Prezident İlham Əliyevin də bəyan etdiyi kimi, burada selektiv yanaşmadan söhbət gedə bilməz.
