“Ordumuz döyüş hazırlığına görə MDB məkanında öndədir” – Deputat tarix yazanlardan danışdı
"Bu gün Azərbaycanın Vətən müharibəsinə başlamasından 1 il ötür. Düz 1 il əvvəl Şanlı Ordumuz Müzəffər Ali Baş Komandan İlham Əliyevin rəhbərliyi ilə işğal altındakı torpaqlarımızın azad edilməsi məqsədilə ilə əks-hücumla Vətən müharibəsinə başlayıb".
Bu fikirləri 1news.az-a açıqlamasında deputat Vüqar Bayramov səsləndirib.
“Bir il öncə Ermənistan tərəfindən növbəti hərbi təxribat törədildi və yaşayış məntəqələrimiz və döyüş mövqeləri şiddətli artilleriya atəşinə tutuldu. Həmin gün düşmənin hərbi təxribatını dəf etmək və təcavüzünə son qoymaq məqsədilə Silahlı Qüvvələrin Ali Baş Komandanı İlham Əliyev dərhal bütün cəbhə boyu əks-hücuma keçmək əmri verdi. Beləliklə də, ölkəmizin ərazi bütövlüyü, tarixi ədalət, beynəlxalq hüquq bərpa etdi”.
Azərbaycanın artıq yeni quruluculuq mərhələsinə qədəm qoyduğunu deyən millət vəkili əlavə etdi ki, vətəndaşlarımız öz ata-baba evlərinə dönməklə, 30 ilə yaxın işğal altında qalan ərazilərimizdə həyat yenidən canlanacaq:
“Bu, ölkə iqtisadiyyatının yeni mərhələdə inkişafı baxımdan da vacibdir.Hazırda ordumuz dünyada ən güclü 50 ordusu sırasındadır. Azərbaycan Ordusu həmçini döyüş hazırlığına görə MDB məkanında ön sıralarda gedir. Ponu da qeyd edim ki, Prezident İlham Əliyev 2 dekabr 2020-ci il tarixdə sentyabrın 27-nin Azərbaycan Respublikasında Anım Günü kimi təsis edilməsi haqqında Sərəncam imzalayıb.Allah bütün şəhidlərimizə rəhmət etsin!”
Aytən Sakitqızı
