Ukraynadakı vətəndaşlarımızın Rumıniya üzərindən Azərbaycana gəlişi sadələşdirilib
“Ukraynadan Moldovaya gələn və hava yolu ilə Azərbaycana getmək üçün Moldovadan Rumıniyaya yola salınan vətəndaşlarımız üçün prosedur daha da sadələşdirilib, tranzit vizası ləğv olunub”.
1news.az-ın APA-ya istinadla verdiyi xəbərə görə, bunu Azərbaycanın Moldovadakı səfiri Qüdsi Osmanov bildirib.
Qüdsi Osmanov deyib ki, dünən gecə Azərbaycan və Rumıniya Xarici İşlər nazirlikləri arasında danışıqlardan sonra qərar verilib ki, Ukraynadan Moldovaya gələn Azərbaycan vətəndaşlarının Rumıniyaya keçməsi üçün viza tələb olunmasın: “Sadəcə, bizim Səfirlik Azərbaycana hava yolu ilə getmək üçün Rumıniyaya keçəcək vətəndaşlarımızın ad və soyadlarını təqdim edir, o cümlədən Rumıniyanın Moldovadakı səfirliyinə məktub yazırıq ki, bu insanlar sərhəddən keçəcək. Rumıniya Səfirliyi də bu məlumatları Rumıniya Xarici İşlər Nazirliyinə göndərir və sərhəddən artıq həmin vətəndaşlar Rumıniyaya buraxılır. Ancaq Moldova-Rumıniya sərhədini keçmək üçün həmin vətəndaşlarımızın həm də Buxarestdən Azərbaycana tranzit uçuş üçün təyyarə bileti alması lazımdır. Bu biletlər Moldovada onlayn qaydada, yaxud aviakassalardan alına bilər. Kimin imkanı var, biletini alır, kimin də pulu yoxdur, onları da yerləşdirmişik və onların da Azərbaycana qayıtması üçün müvafiq addımlar atılır. Bu insanlar da Azərbaycana qayıdacaqlar”.
Səfir onu da qeyd edib ki, indiyə qədər Ukraynadan Moldovaya 500-ə qədər Azərbaycan vətəndaşı gəlib: “Vətəndaşlarımızı Səfirliyimizin əməkdaşı Palanka və Oxnitsa sərhəd-keçid məntəqələrindən avtobusla Kişinyova yola salır, Səfirlik bunun xərcini özü ödəyir. Kişinyova gələndə də bu insanların hər biri xüsusi diqqət mərkəzində olur, müvafiq qaydada yerləşdirilirlər. Bunun üçün Moldova hökuməti müvafiq yerlər ayırıb, eyni zamanda, burada yaşayan azərbaycanlılar da onları öz evlərində yerləşdirir. Onlardan kimin imkanı var, otellərdə qalır. Yəni bu sahədə də bir problem yoxdur”.
Qeyd edək ki, Moldova hökuməti Ukraynadan hazırda qaçqınları qəbul etmək üçün iki sərhəd-keçid məntəqəsi müəyyənləşdirib. Bunlar Palanka və Oxnitsa sərhəd-keçid məntəqələridir.
Mövzu ilə əlaqədar oxuyun:
Zelenski: Ordu ilə birlikdə Ukraynanı müdafiə edəcəyik - VİDEO
Zelenski Kiyevdə olduğunu sübut etmək üçün video paylaşdı: “Biz hamımız buradayıq” - VİDEO
Ermənilər Ukraynaya qarşı döyüşlərdə iştirak edir - Hayrapetyan
Xarkovdakı konsulluq Ukraynadan Azərbaycana qayıtmaq üçün qeydiyyata başlayır
Azərbaycanın Xarkovdakı konsulluğu soydaşlarımıza müraciət edib
Ukraynada yaşayan azərbaycanlılar üçün qaynar xətt yaradılıb
Ali Rada Ukraynada hərbi vəziyyətin tətbiqini dəstəkləyib
Ukraynada fövqəladə vəziyyət rejimi tətbiq edilib
Zelenski xalqa səsləndi: “Biz hamıya qalib gələcəyik, çünki biz Ukraynayıq”
