Deputat: “Ankarada Azərbaycan və Türkiyə Prezidentləri arasında keçirilən görüş çox məhsuldar olub”
Ötən gün – 10 martda Azərbaycan Prezidenti İlham Əliyev Türkiyənin paytaxtı Ankarada işgüzar səfərdə olub. Səfər çərçivəsində İlham Əliyevlə Türkiyə Prezidenti Rəcəb Tayyib Ərdoğan arasında önəmli müzakirələr aparıldı.
Bəs görəsən bu görüşdən hansı əhəmiyyətli nəticələr çıxdı?
Məsələ ilə bağlı 1news.az-danışan Milli Məclisin deputatı Naqif Həmzəyev deyib ki, bu görüşdə əsasan Azərbaycan-Türkiyə qardaşlıq və dostluq münasibətlərinin müttəfiqlik əsasında daha da inkişaf etdirilməsi vurğulandı.
“Bu səpkidə görüşlər zamanı müzakirələr təşkil olundu. 4 saatdan çox olan bu görüş zamanı müttəfiqliklə bağlı bütün məqamlar bir daha gözdən keçirildi. Xüsusilə post-münaqişə dövründə Azərbaycan və Ermənistan arasındakı əlaqələrin normallaşması perspektivləri bir daha nəzərdən keçirildi və Zəngəzur dəhlizinin açılması üçün görülən işlər və xüsusilə də Qars-Naxçıvan arasında dəmir yolunun çəkilməsinin əhəmiyyəti qeyd olundu”.
Deputat bildirib ki, post-münaqişə dövründə Ermənistan-Azərbaycan arasında münasibətlərin normallaşması ilə yanaşı Türkiyə-Ermənistan münasibətlərinin də yaxşılaşması ilə əlaqədar Türkiyə və Ermənistan tərəfinin xüsusi nümayəndələri təyin olunub.
“Bu heyətlər arasında təmaslar da prezidentlərin görüşləri zamanı müzakirə olunmuşdur. Azərbaycan Avropanın enerji təhlükəsizliyində çox önəmli rol oynayır. Xüsusilə Cənub qaz dəhlizinin uğurla fəaliyyəti nəticəsində Azərbaycan qazının Türkiyə üzərindən Avropaya çatdırılması artıq reallaşıb. Bu qaz dəhlizi vasitəsilə Avropanın qaz təchizatının artırılması imkanları iki prezident arasında yenidən müzakirə olundu. Gələcək üçün Iğdır-Naxçıvan qaz xəttinin çəkilməsi ilə bağlı da müzakirələr aparılıb, Azərbaycan dövləti tərəfindən bununla bağlı investisiya nəzərdə tutulduğu xüsusilə vurğulanıb”
“Hal-hazırda dünya gündəmini tutan Ukrayna-Rusiya münasibətlərindəki gərginlik və müharibənin baş verməsidir” – deyə, Deputat əlavə edib.
“Bu da bizim regiona çox mənfi təsirlərini göstərir. Cənab Prezident İlham Əliyev tərəfindən Rəcəb tayyib Ərdoğanın bu müharibənin tezliklə dayandırılması ilə əlaqədar şəxsi təşəbbüslərini ortaya qoymasını çox müsbət qiymətləndirmiş və iki dövlət arasında tezliklə sülh imzalanmasını və müharibənin dayandırılmasının ən optimal variant olduğu xüsusilə qeyd edilib”.
N.Həmzəyev deyib ki, Azərbaycan və Türkiyə Prezidentləri arasında keçirilən görüş çox məhsuldar olub.
“Düşünürük ki, iki qardaş dövlət arasında münasibətlərin yaxşılaşdırılması və əlaqələrin gücləndirilməsi üçün bu görüşün əhəmiyyəti xüsusilə qeyd olunmalıdır. Cənab Prezidet İlham Əliyev Türkiyə Prezidentini Azərbaycana səfərə dəvət etdi. Düşünürük ki, iki dövlət birlikdə bütün çətinlikləri arxada qoya biləcək, dövlətlərimizin, xalqlarımızın rifahı naminə, iqtisadiyyatımızın güclənməsi naminə biz güclərimizi birləşdirəcəyik. İnanırıq ki, 2022-ci ildə planda olan məsələlər də öz həllini tapacaq”.
