Deputat: İlham Əliyevin imzaladığı növbəti əfv sərəncamı humanizm siyasətinin daha bir əyani nümunəsidir

“Ölkəmizdə həyata keçirilən humanizm siyasəti cəmiyyətimiz tərəfindən hər zaman yüksək dəyərləndirlir. Ulu öndər Heydər Əliyevin əsasını qoyduğu bu siyasət Prezident İlham Əliyev tərəfindən uğurla davam etdirilir. Humanizm siyasətinin ifadəsi olan əfv sərəncamlarının dövlətimizin başçısı tərəfindən imzalanması xeyli sayda insanın ailələrinə sevinc bəxş edir”.

Bu fikirləri Milli Məclisin Beynəlxalq münasibətlər və parlamentlərarası əlaqələr komitəsinin sədr müavini Sevinc Fətəliyeva deyib.

Deputat bildirib ki, Prezidenti İlham Əliyevin 28 May – Müstəqillik Günü ərəfəsində imzaladığı növbəti əfv sərəncamı da humanizm siyasətinin daha bir əyani nümunəsidir. Onun sözlərinə görə, dövlət başçısı ənənəvi olaraq, bayram günləri, bir sıra əlamətdar tarixi günlər öncəsi imzaladığı əfv sərəncamları, eyni zamanda Birinci vitse-prezident Mehriban xanım Əliyevanın təşəbbüsü ilə qəbul edilən amnistiya aktları on minlərlə insanı azadlığa qovuşdurub.

“Mayın 27-də cənab Prezidentin imzaladığı sərəncama əsasən, məhkum olunmuş bir sıra şəxslərin, onların ailə üzvlərinin, İnsan hüquqları üzrə müvəkkilin, insan hüquqlarının müdafiəsi təşkilatlarının əfv haqqında müraciətlərinə baxılaraq, məhkumların şəxsiyyəti, səhhəti, ailə vəziyyəti, törətdikləri cinayətlərin xarakteri və ictimai təhlükəlilik dərəcəsi, cəza çəkdikləri müddəti və həmin müddətdə davranışları nəzərə alınaraq, humanizm prinsipləri əsas götürülərək ümumilikdə 213 nəfər əfv edilib. Belə ki, azadlıqdan məhrumetmə cəzasına məhkum olunmuş 168 nəfər cəzasının çəkilməmiş hissəsindən azad edilib, 36 nəfərin cəzasının çəkilməmiş hissəsi yarıyadək azaldılıb. Eləcə də azadlıqdan məhrumetmə cəzasına şərti olaraq məhkum edilmiş 3 nəfər cəzadan azad ediliblər. Həmçinin azadlığın məhdudlaşdırılması cəzasına məhkum edilmiş 6 nəfər cəzalarının çəkilməmiş hissəsindən azad olunublar.

Dövlət başçısı tərəfindən əfv sərəncamlarının verilməsi istər humanizm, istər əxlaqi, istərsə də cəmiyyətdaxili harmoniyanın qorunması baxımından böyük önəm daşıyır. Düşünürəm ki, 28 May – Müstəqillik Günü ərəfəsində dövlət başçısı tərəfindən atılan bu humanist addım cəmiyyətimizdə birlik və həmrəyliyin güclənməsinə böyük töhfə verir, eləcə də yüzlərlə ailəyə sevinc bəxş edir”-deyə, S.Fətəliyeva vurğulayıb.