Həkim, ofisant, işıqçı, fəhlə - Azərbaycanlı məşhurların ilk işləri
Onlar məşhur olmamışdan öncə bir sıra işlərdə çalışıblar.
Məşhur olmadan öncə, həkim, ofisant, işıqçı, hətta fəhlə olaraq çalışanlar olub. Söhbət yerli tanınmış simalarımızdan gedir. Ölkənin tanınmış simaları olmamışdan əvvəl bir çox peşələrdə fəaliyyət göstəriblər.
1news.az Azərbaycanın tanınmış şəxslərinin bir qisminin ilk işlərini araşdırıb. Siyahını təqdim edirik:
Xalq artisti Flora Kərimova ixtisasca həkimdir. Müğənni ali təhsilini 1971-ci ildə Azərbaycan Dövlət Tibb İnstitutunun müalicə işi üzrə tamamlayıb. Ardınca isə Bakı Musiqi Akademiyasının vokal sinfindən məzun olub.
Azərbaycan SSR xalq artisti, diktor, Azərbaycan Televiziyasının aparıcısı mərhum Rafiq Hüseynli maddi sıxıntılar səbəbindən 17 yaşında AZTV-də işıqçı olaraq işə başlayır. Çox keçmədən mərhum diktorun istedadı hiss olunur və 1966-cı ildə təcrübəçi diktor kimi fəaliyyətə başlayır.
Xalq artisti Aygün Kazımova isə məktəb illərindən idmançı olub. O, həndbol üzrə yığma komandanın qapıçısı və kapitanı olub.
Cənab Qızıl Şlyager, 100% F.A Xalq artisti Faiq Ağayev Azərbaycan Dövlət Tibb Universitetinə qəbul olsa da ali təhsilini yarımçıq qoyaraq ADMİU-nin musiqili teatr aktyoru fakültəsini fərqlənmə diplomu ilə bitirib.
Xalq artisti Röya BDU beynəlxalq hüquq ixtisasından məzun olub.
Tanınmış müğənni Xatirə İslam əvvəllər ölkədə fəaliyyət göstərən xəstəxanaların birində tibb bacısı vəzifəsində çalışıb.
Hər birimizin ən sevdiyi Azərbaycan mahnılarından biri olan "Başqa birisini sevə bilməzsən" mahnısını ifa edən müğənni isə Elxan Şirinov müəllim olub.
Müğənni Nadir Qafarzadə məşhur olmamışdan öncə ofisiant olaraq restoranlarda çalışıb. Daha sonra işlədiyi restoranda mahnı oxumağa başlayıb. Bir müddətdən sonra böyük səhnəyə ilk addımlarını atıb.
Tanınmış stilist Samiraldo uşaqlar evindən məzun olduqdan sonra fəhlə olaraq çalışıb. Sonra dərziliklə məşğul olan Samiraldo özünü stilist kimi sınayıb. Hazırda bu sahədə fəaliyyət göstərən Samiraldo həm də sosial şəbəkələrdə izləyicilərinin sevimlisinə çevrilib.
