Əmanət faizlərinin vergidən azad olunması ilə bağlı güzəştin müddəti artırıla bilər? – AÇIQLAMA
Fevralın 1-dən Azərbaycanda yerli bankların və xarici bankın yerli filiallarının fiziki şəxslərin əmanətləri üzrə ödədiyi illik faiz gəlirləri vergiyə cəlb edilə bilər.
Belə ki, qeyd olunan gəlirlər güzəşt olaraq 2016-cı il fevralın 1-dən 7 il müddətinə vergidən azad edilib.
Bu müddət başa çatdığı üçün bir banklar öz müştərilərinə xəbərdarlıq mesajı göndərməyə başlayır.
Bəs görəsən bu güzəştin müddəti artırıla bilər?
Məsələ ilə bağlı 1news.az-a danışan Milli Məclisin deputatı Vüqar Bayramlı deyib ki, bu istiqamətdə müzakirələr gedir.
“Depozitlərlə bağlı vergi güzəştlərinin ləğvi ilə bağlı fərqli yanaşmalar var. Mənim təklifim ondan ibarətdir ki, sığortalanan əmanələr üçün vergi güzəştlərinin saxlanılması məqsədəuyğundur. Söhbət 100 min manata qədər olan əmanətlərin gəlirlərinin vergiyə cəlb edilməməsi və həmin əmanətlər üçün güzəştin saxlanılmasından gedir. Bu, həm də bir meyardır. Orta təbəqə vətəndaşlarımızın yerləşdirdiyi əmanətlər fərqli məbləğdə olurlar, bəziləri daha kiçikdir".
"Ona görə 100 min manatdan aşağı olan əmanətlər üçün güzəştin saxlanılması məqsədəuyğundur" - deyə, deputat əlavə edib:
“Biz bununla bağlı təkliflərimizi də hökumətə təqdim etmişik. Bizim yanaşmamız ondan ibarətdir ki, sığortalanan əmanətlərin vergiyə cəlb edilməsi məqsədəuyğun deyil, onlar üçün güzəşt saxlanılmalıdır. Bu istiqamətdə aparılan müzakirələr yekunda əmənətlərin gəlirlərinin vergiyə cəlb edilməsi ilə bağlı yeni bir qərarın qəbul edilməsinə gətirib çıxara bilər. Biz diferinsial yanaşmanın və sığortalanan əmanətlərin vergiyə cəlb edilməməsinin tərəfdarıyıq”.
