Milli Abilimpiya Federasiyasında X Beynəlxalq Abilimpiya Çempionatına həsr edilmiş görüş keçirilib
Fevralın 22-si Milli Abilimpiya Federasiyasında X Beynəlxalq Abilimpiya Çempionatına həsr edilmiş görüş keçirilib.
1news.az xəbər verir ki, Görüşdə Azərbaycan Respublikası Milli Abilimpiya Federasiyasının prezidenti İlqar Rəhimov, Fransanın Azərbaycandakı səfiri xanım Ann Buayon, Milli Abilimpiya Federasiyasının vitse-prezidentləri Rüfət Hacılı və Aqşin Babayev, UNICEF Azərbaycanın nümayəndəsi Nigar Nəsrullayeva, Federasiyanın idarə heyətinin üzvləri Firudin İmanov və Cəmilə Abdulova, DOST İnklüziv İnkişaf və Yaradıcılıq Mərkəzinin media və ictimaiyyətlə əlaqələr şöbəsinin müdiri Elvin İbrahimov və milli komanda üzvləri iştirak ediblər.
Milli Abilimpiya Federasiyasının prezidenti İlqar Rəhimov 22-25 mart 2023-cü il tarixlərində Fransanın Mets şəhərində keçiriləcək X Beynəlxalq Abilimpiya Çempionatına hazırlıqların son mərhələdə olduğunu bildirib. 40-a yaxın ölkənin iştirak edəcəyi X Beynəlxalq Abilimpiya Çempionatında ölkəmiz ilk dəfə olaraq təmsil olunacaq. Federasiya prezidenti İlqar Rəhimov qeyd edib ki, Azərbaycan millisi 11 kişi və 4 qadın olmaqla ümumilikdə 15 nəfər iştirakçı ilə çempionata qatılacaq. İştirakçılar 2022-ci ilin dekabr ayında keçirilmiş I Milli Abilimpiya Çempionatında müvəffəqiyətli iştirak etmiş abilimpiyaçılar arasında seçiliblər. Abilimpiyaçılar poster dizayn, proqramlaşdırma, kompüter yığılması, web səhifələrin hazırlanması, dərzilik, çörək bişirilməsi, masaj, dulusçuluq, aşpazlıq, mətn tərtibi, ağac üzərində oyma, multimedia jurnalistikası, milçə ilə toxuculuq sahələri daxil olmaqla ümumilikdə 13 peşə sahəsi üzrə öz güclərini sınayacaqlar. İlqar Rəhimov qeyd edib ki, komanda üzvlərinin biliklərinin daha da artırılması məqsədilə hazırda onlar gündəlik olaraq təlimlərdə iştirak edirlər.
Eyni zamanda Federasiya prezidenti İlqar Rəhimov martın 22-də Beynəlxalq Abilimpiya Federasiyasının Mets şəhərində keçirəcəyi hesabat-seçki konfransında iştirak edəcəyi barədə məlumat verib. İ.Rəhimov bildirib ki, hesabat-seçki konfransında idarə heyətinin üzvlüyünə Milli Abilimpiya Federasiyanın vitse-prezidenti Rüfət Hacılının namizədliyi təklif olunacaq.
Daha sonra Azərbaycan milli komandası üçün hazırlanmış formanının təqdimatı keçirilib. Görüşdə Milli komandanın kapitanı da seçilib. Mətn tərtibi peşə sahəsi üzrə ölkəmizi təmsil edəcək Cəmilə Məmmədlinin qoluna simvolik olaraq kapitan sarğısı taxılıb. C.Məmmədli ona göstərilən etimada görə təşəkkürünü bildirərək qeyd edib ki, abilimpiyaçılar ölkəmizi beynəlxalq tədbirdə layiqincə təmsil edəcəklər.
Görüşdə iştirak edən Fransanın Azərbaycandakı səfiri xanım Ann Buayon abilimpiyaçılara qarşıdan gələn yarışda uğurlar arzulayıb. O, ölkəmizdə abilimpiya hərəkatının inkişafını yüksək qiymətləndirib.
Qeyd edək ki, abilimpiyaçılar martın 21-i Fransaya yola düşəcəklər.
