“Avropa İttifaqının bayrağı altında Fransanın mövqe ortaya qoyması çox biabırçı bir səhnə idi” - ŞƏRH
“Beynəlxalq ictimaiyyətin erməni yalanlarına göz yummağı qlobal maraqlarla bağlıdır”.
Bu sözləri 1news.az-a açıqlamasında politoloq Əziz Əlibəyli deyib.
“Əgər dünyada bir neçə siyasi mövqenin toqquşduğu siyasi coğrafiya varsa, onlardan biri Qafqazdır. Kiçik bir misal deyim. Hazırda Afrikada Fransa müstəmləkələri uğrunda Fransa, Rusiya və Çin arasında mübarizə gedir. Fransa artıq son 2 il ərzində artıq 5-ci ölkədir ki, itirir. Bu ölkələr ya Çin tərəfinə keçir, ya da ki Rusiya. Ona görə də Fransa alternativ kimi Ermənistanın yaratdığı münaqişəli vəziyyətdən istifadə etməklə Rusiyanın arxa cəbhəsində yeni bir problem zonası yaratmaq və burada başını qatmaq niyyəti güdürdü. Bu prizmandan əlini gücləndirən həm də Rusiya-Ukrayna müharibəsi oldu. Bu mənada qeyd edək ki, bu mənada beynəlxalq çərçivədə istər-istəməz təkcə Ermənistan deyil, marağı olan digər ölkələr də Ermənistanın yaratdığı bu qeyri-hüquqi vəziyyətdən faydalanırlar. Bu bilavasitə beynəlxalq maraqlarla bağlıdır.
“İkincisi, təbii ki, biz bunu doğru hesab edirik ki, erməni yalanlarına göz yumurlar” – deyə o fikirlərinə davam edib:
“Çünki de-fakto Qafqaz Rusiyanın, Böyük Britaniya, İran və Fransanın maraq zonasında olduğundan bu bölgə uğrunda digər güclərin mübarizəsi var və belə mübarizə olduğu şəraitdə xalqların hüquqları ikinci plana keçir. Hətta dünənki prizmadan gördük ki, Yaponiyanın dilə gətirdiyi BMT-nin əsas prinsipi olan dövlətlərin ərazi bütövlüyünün pozulmaması məsələsi ən yüksək şəkildə etiraf edildi. Amma biz 30 il bunun acısını çəkmişik. Bu faktorlar 30 il ərzində öz maraqlarını güdən BMT Təhlükəsizlik Şurasının daimi üzvlərinə bu məsələ ilə bağlı yekun addımlar atmağa imkan vermədi. Azərbaycan əleyhinə dünənki iclasda qətnamə qəbul edilmə ehtimalı az idi. Amma əgər belə bir ehtimal nəzərdə saxlasaq dərhal BMT mexanizmində üç müstəvidə qərar qəbul edilməsinə baxmalıyıq. Birinci mətbuat və media üçün press-relizdir. Yəni ümumi məlumatlandırma sənədidir. İkincisi, sanksiyalardır. Hərbi əməliyyatların tətbiqidir. Yəni Ermənistan çalışır ki, birinciyə nail olsun. Bir məlumatlandırma xarakterli sənəd qəbul edilsin və ona istinad etsinlər ki, Azərbaycan beynəlxalq hüququn prinsiplərini pozur. Orada guya “erməni etnik azlığını soyqırımına məruz qoyur” iddiasını səsləndirirlər və humanitar hüququn pozulması məsələsini önə çəkirlər. Bunun üzərindən sənədin qəbul edilməsi və ona istinad məsələsini əsas tutmuşdular. Əminəm ki, xüsusən də Avropa İttifaqının bayrağı altında Fransanın mövqe ortaya qoyması çox biabırçı bir səhnə idi".
O, qeyd edib ki, iki gün əvvəl prezident köməkçisi Ağdama xarici attaşeləri apararkən səsləndirdiyi fikir 2 şeyi gündəmə gətirdi. Əsas nüans budur ki, reinteqrasiya prosesinin tərkib hissəsi kimi bölgədəki silahların zərərsizləşdirilməsi və silahların çıxarılması məsələsidir. Bu Azərbaycanın antiterror əməliyyatını reinteqrasiya prosesinin tərkib hissəsi kimi gördüyünə işarə idi.
“İndiki vəziyyətdə Ermənistanın çıxış yolu nədir?” sualının tam cavabıni belə vermək olar: "Dünən beynəlxalq birlik Azərbaycana tövsiyyə elədi ki, humanitar təchizatı tam təmin etsin. Onsuz da Azərbaycan bunu edir. Ermənistan üçün bunu bəyan etdi ki, əgər Azərbaycan tələb edirsə ki, alternativ yol Ağdam-Xankəndi yolundan keçsin, Ermənistan buna riayət etməlidir.
Biz görürük ki, yenə sərhəddə toquşmalara aparan proseslər yaşanmaqdadır. Ermənistan əmin olsun ki, dünənki BMT iclasından sonra onun beynəlxalq birlik tərəfindən dəstəyinin olmaması təkcə onun yox, həm də arxasındakı ölkələrin budəfəki periodda daha ağır toqquşmaları və məğlubiyyətləri gətirir”.
Qeyd edək ki, avqustun 16-da Nyu-Yorkda BMT Təhlükəsizlik Şurasının Azərbaycanın Qarabağ bölgəsində guya yaranmış “humanitar böhran”ın müzakirəsinə dair təcili iclası, erməni lobbisinin bütün gücünü ortaya qoymağa çalışdığı toplantısı keçirilib.
