Ceyhun Bayramov: Torpaqlarımızın geri qaytarılması ölkə siyasətinin ən vacib xətti idi

Torpaqlarımızın işğaldan azad olunması, bayrağımızın Şuşada və digər işğal altında olan ərazilərimizdə dalğalanması Ulu Öndər Heydər Əliyevin arzusu, Prezident İlham Əliyevin isə amalı idi.

1news.az APA-ya istinadən xəbər verir ki, bunu xarici işlər naziri Ceyhun Bayramov Prezident İlham Əliyevin prezidentliyinin 20 illiyinə həsr olunmuş “Vətənə, xalqa və dövlətçiliyə misilsiz xidmətinin 20 ili” adlı konfransda çıxışı zamanı deyib.

“Torpaqlarımızın ya sülh, ya da hərb yolu ilə geri qaytarılması ölkə siyasətinin ən vacib xətti idi. Prezident İlham Əliyev Vətən Müharibəsi başlayan zaman xalqa müraciətində bütün dünyanın Qarabağı Azərbayanın ərazisi kimi tanıdığını, büeynəlxalq hüququn bizim tərəfimizdə olduğunu deməsi böyük zəfərə aparan yolun başlağıncı idi”, o deyib.

Nazir deyib ki, Azərbaycanın ərazi bütövlüyünün bərpası, Qarabağın Azərbaycan ərazisi kimi qəbul edilməsi beynəlxalq hüququn bizim yanımıza olması deməkdir.

“Qaçqın və məcburi köçkünlərin öz ata-baba yurdlarına qaytarılması istiqamətində atılan addımlar bu məsələnin daima dövlət siyasətinin diqqətində olmasının göstəricisidir. Eləcə də erməni terrorizmin ifşası Prezident İlham Əliyevin apardığ fövqəladi siyasətin əsas göstəricilərindəndir”, - o əlavə edib.

Ceyhun Bayramov həmçinin qeyd edib ki, Azərbaycanın keçmiş münaqişə istiqamətində apardığı siyasət heç vaxt dəyişməyib.

“Bu siyasət qanunsuz işğal faktının aradan qaldırılması, qaçqın və məcburi köçkünlərin öz yurdlarına qayıtmasını əsas götürüb.
Azərbaycan hər zaman erməni təxribatını lazımi formada cavablayıb, dövlət başçısının rəhbərliyi bu təxribatları ifşa edib”, - nazir vurğulayıb.