Azərbaycanlı deputat AŞPA–nın uşaqlar üzrə baş məruzəçisi seçilib
Avropa Şurası Parlament Assambleyasının (AŞPA) sosial məsələlər, səhiyyə və davamlı inkişaf Komitəsinin iclası öz işinə başlayıb.
1news.az AZƏRTAC-a istinadən xəbər verir ki, Parisdə keçirilən Komitə iclasının ilk günündə Azərbaycanın AŞPA-dakı nümayəndə heyətinin üzvü Sevinc Fətəliyeva qurumun sosial məsələlər üzrə iclasında Avropa Şurası Parlament Assambleyasının uşaqlar üzrə baş məruzəçi seçilib. Azərbaycanlı deputata iclasda yekdilliklə səs verilib.
Komitə iclasında “Avropada uşaqların istismarı: həll yolu, kompensasiya və belə halların qarşısının alınması”, “İnternetdən istifadə zamanı uşaqların müdafiə hüququ”, “Mənzil və layiqli yaşayış hüququnu təmin etmək üçün təhlil və təlimatlar”, “İqlim böhranına qarşı Avropa Şurasının dənizlər və okeanlar strategiyalarına doğru” kimi bir çox mövzu müzakirə olunacaq.
Həmçinin komitə iclasında “Reykyavik prosesi ilə təhlükəsiz, təmiz, sağlam və davamlı ətraf mühitə insan hüququnun tətbiqi” adlı məruzə ətrafında ekspertlərlə fikir mübadiləsi keçiriləcəyi gözlənilir.
