“Cənab Prezident, çox qürurverici bir hissdir ki, Siz bizə daim yanımızda olduğunuzu hiss etdirirsiniz” – Prezidentə yazırlar
Prezident İlham Əliyevin dünyada tüğyan edən koronavirus pandemiyasının Azərbaycanda geniş yayılmasının qarşısının alınması, insanların sağlamlığının qorunması və rifahının yaxşılaşdırılması ilə bağlı verdiyi qərarlar vətəndaşlarımız tərəfindən böyük rəğbətlə qarşılanır.
Görülən işlər dövlətimizin başçısının xalqımıza diqqət və qayğısının bariz nümunəsi kimi qiymətləndirilir. Azərbaycan vətəndaşları bu diqqət və qayğıya görə Prezident İlham Əliyevə minnətdarlıqlarını ona ünvanladıqları çoxsaylı məktublarda ifadə edirlər.
Bu haqda 1news.az dövlət başçısının rəsmi saytına istinadla həmin məktubların bir qismini təqdim edir.
Səmayə Qasımovadan, Şirvan, Azərbaycan
“Hörmətli cənab Prezident.
Hər bir Azərbaycan vətəndaşı Sizin gördüyünüz işlərin dəyərini çox yaxşı bilir və hər zaman Sizə güvənir.
Cənab Prezident, çox qürurverici bir hissdir ki, Siz bizə daim yanımızda olduğunuzu hiss etdirirsiniz. Biz hər şeydən arxayınıq. Siz vədlərinizi öz işinizlə yerinə yetirirsiniz. Bu çətin məqamlarda atdığınız addımlarla, verdiyiniz qərarlarla hər bir Azərbaycan vətəndaşının Prezidenti olduğunuzu bir daha sübut etdiniz. Koronavirusa qarşı mübarizədə Sizin sosial həmrəylik nümayiş etdirilməsi barədə dəyərli tövsiyə və tələblərinizə biz şirvanlılar ciddi əməl edirik və xalqımızı da diqqətli, məsuliyyətli olmağa səsləyirik.
Cənab Prezident, bu gün Azərbaycandakı sabitlik, abadlıq, quruculuq işləri fərəhlidir, ürəkaçandır. Tutduğunuz bu haqq yolunda Sizə bütün şirvanlılar adından uğurlar arzulayıram. Allah Sizi qorusun”.
Əjdər İbrahimovdan, Mingəçevir, Azərbaycan
“Möhtərəm cənab Prezident.
“Azərbaycan” İES-in yenidən qurulması ilə əlaqədar verdiyiniz tapşırığa əsasən müəssisə əsaslı təmir edilib. Bu, biz energetiklər üçün böyük sevincdir. Bu gün “Azərbaycan” İES-in gecə görüntüləri şəhərimizin gözəlliyinə yeni rəng qatıb. Bu gözəlliklər Azərbaycanımızın inkişafı deməkdir və gələcəyə ümidimizdir.
Görülən bütün bu işlər Sizin tapşırığınızla həyata keçirilir. Ona görə də Sizə minnətdarıq. Ulu Tanrı köməyiniz olsun”.
Emin Əlizadədən, Ağcabədi, Azərbaycan
“Hörmətli cənab Prezident.
Hər şeydən əvvəl şəxsən öz adımdan, bütün yaxınlarımın və Azərbaycan xalqının adından Sizə təşəkkür edirəm. Siz dünyanı cənginə almış koronavirus pandemiyası dövründə Azərbaycan xalqının sağlamlığını hər şeydən üstün tutaraq onu böyük bir fəlakətdən qorumaqdasınız. İllər keçəcək, amma Sizin bu əvəzsiz xidmətləriniz heç vaxt unudulmayacaq, yaddaşlardan silinməyəcəkdir. Hər zaman var olasınız!”
Yusif Hüseynovdan, Bakı, Azərbaycan
Möhtərəm cənab Prezident.
Xalqımız Sizin ölkəyə rəhbərlik etdiyiniz dövrdə ölkəmizdə siyasi və iqtisadi inkişafın şahidi olub. O cümlədən Zirə qəsəbəsinin sakinləri Sizin uğurlu siyasətinizi yüksək qiymətləndirirlər. Sizin tərəfinizdən Zirə qəsəbəsinin sakinlərinin rifahının yüksəldilməsi üçün yeni layihələrə imza atılır. Sizin tapşırığınızla Zirə qəsəbəsində əsaslı quruculuq işləri görülüb, yeni iş yerləri açılıb. Məhz Sizin apardığınız məqsədyönlü siyasətin nəticəsidir ki, Zirə hazırda şəhər tipli qəsəbəyə çevrilib. Biz də bunun qarşılığında abadlıq-quruculuq işlərinin davam etdirilməsi üçün əlimizdən gələni əsirgəmirik.
Cənab Prezident, Siz dünyanı bürümüş koronavirus pandemiyası dövründə Azərbaycan xalqının sağlamlığını hər şeydən üstün tutaraq, onu böyük fəlakətdən qorumaqdasınız. Vaxtilə köməyə ehtiyacı olan Azərbaycan hazırda dünyanın inkişaf etmiş ölkələrindən birinə çevrilib, digər dövlətlərə yardım göstərə biləcək qüvvəyə malik olub.
Bir daha Sizə dərin təşəkkürümü bildirirəm. Sizə və ailənizə uzun ömür, cansağlığı və gələcək işlərinizdə uğurlar arzulayıram”.
S.Xankişiyeva