Əli Həsənov: Bu müxalifətə görə utanırıq – VİDEO
Azərbaycan Respublikası Prezidentinin ictimai-siyasi məsələlər üzrə köməkçisi Əli Həsənov AzTV-nin "Həftə" verilişinin qonağı olub.
1news.az-ın məlumatına görə, proqramda AzTV-nin sədri, aparıcı Rövşən Məmmədovun suallarını cavablandıran Ə. Həsənov Prezident İlham Əliyevin Rusiyaya səfəri, iki ölkə arasındakı münasibətlər, milli maraqlar və bu maraqlara qarşı aparılan kampaniya barədə məsələlərə toxunub.
O, Prezident İlham Əliyevin “Valday” disskusiya klubunda Qarabağ məsələsi ilə bağlı tarixi çıxışına toxunaraq, həmin çıxışın böyük ajiotaj yaratdığını bildirib. Dövlət başçısının Rusiya səfəri zamanı iki ölkə arasında münasibətlərin inkişafı baxımından mühüm əhəmiyyət kəsb etdiyini deyib.
Ə. Həsənov Azərbaycanda özünü müxalifət adlandıran qaragüruh şəxslərin ölkənin uğurlarının əleyhinə apardığı kampaniyadan da danışıb. O, müxalifətin 1994-cü ildə “Əsrin kontraktı”nı pozmağa cəhd etdiyini də qeyd edib:
“1994-cü il hadisələri zamanı Azərbaycan müxalifəti meydana çıxıb dövlətini, dövlətçiliyini müdafiə edən xalqın yanında yox, qarşısında oldular. 1994-cü ilin oktyabrında da, 1995-ci ilin martında da bu silahlı dəstələr Azərbaycan dövlətini Heydər Əliyevin ortaya qoyduğu milli birlikdən çəkindirmək istəyirdi. Azərbaycanı dünyada öz fikrini müstəqil söyləmək imkanından məhrum etmək istəyirdi. “Əsrin kontraktı”nı pozmaq istəyirdilər.
Təəssüf ki, bizim nə qədər vətənpərvər, iradəli, əzmli xalqımız var, bir o qədər də utancverici müxalifətimiz var. ATƏT-in bu yaxınlarda Varşavada keçirilən tədbirlərində yalnız Azərbaycan müxalifəti orada öz dövlətinin, xalqının, millətinin əleyhinə çıxış edirdi. Təəssüflər ki, biz bir tərəfdən əzmkar, iradəli, vətənpərvər xalq olmağımızla qürur hissi keçiririk, digər tərəfdən antixalq, qeyri-vətənpərvər müxalifətlə xəcalət hissi keçiririk”.
Ə.Həsənovun müsahibəsini təqdim edirik.
1news.az