1news.az

Ermənistanın Gəncəyə raket hücumu ilə əlaqədar Ukrayna, Belarus və Moldova KİV-lərinə bəyanat ünvanlanıb

17 Oktyabr saat 19:36 ~ 2 dəqiqəlik oxu 1800
Ermənistanın Gəncəyə raket hücumu ilə əlaqədar Ukrayna, Belarus və Moldova KİV-lərinə bəyanat ünvanlanıb

AZƏRTAC-ın Ukrayna, Belarus və Moldova üzrə xüsusi müxbiri Emil Hüseynli Ermənistan silahlı qüvvələrinin cəbhə zonasından uzaqda yerləşən, Azərbaycanın ikinci ən böyük şəhəri olan Gəncənin mərkəzi hissəsindəki yaşayış binalarını oktyabrın 17-nə keçən gecə növbəti dəfə raket atəşinə tutması ilə əlaqədar Ukrayna, Belarus və Moldova KİV-lərinə bəyanat ünvanlayıb.

AZƏRTAC xəbər verir ki, 40-a yaxın informasiya agentliyinə, portal və qəzetə ünvanlanan bəyanatda işğalçı Ermənistan silahlı qüvvələrinin beynəlxalq hüququn norma və prinsiplərini, 1949-cu il Cenevrə konvensiyalarını və onların Əlavə protokollarını, razılaşdırılmış humanitar atəşkəs rejiminin tələblərini pozaraq, Azərbaycanın dinc əhalisini qəsdən hədəfə almaqla yaşayış məntəqələrini raket atəşinə tutmaqda davam etdiyi qeyd olunub.

Vurğulanıb ki, Ermənistan silahlı qüvvələrinin oktyabrın 17-də gecə saat 1 radələrində cəbhə zonasından uzaqda yerləşən, Azərbaycanın ikinci ən böyük şəhəri Gəncənin mərkəzi hissəsini raket atəşinə tutması nəticəsində ilkin məlumata görə, 13 nəfər həlak olub, 45-dən çox insan yaralanıb, çoxsaylı mülki infrastruktur obyektinə, nəqliyyat vasitəsinə külli miqdarda ziyan dəyib. Ölənlərdən 3-ü azyaşlı uşaq, 4-ü qadındır.

Sentyabrın 27-dən bu günə qədər Ermənistan silahlı qüvvələrinin Azərbaycanın yaşayış məntəqələrini ağır artilleriyadan və raket sistemlərindən atəşə tutması nəticəsində 60 mülki şəxs həlak olub, 270 nəfər isə xəsarət alıb. Həmçinin Ermənistan ordusunun intensiv ağır artilleriya və raket atəşi nəticəsində 1704 ev, 90 çoxmənzilli yaşayış binası və 327 mülki obyekt yararsız vəziyyətə düşüb.

Bəyanatın sonunda Ukrayna, Belarus və Moldova KİV-lərinin Ermənistanın terrorçu siyasətini obyektiv işıqlandırmağa və Azərbaycanın haqlı mövqeyini müdafiə etməyə çağırılıb.

Media nümayəndələrinə, həmçinin Gəncənin raket atəşinə tutulması ilə bağlı fotolar da təqdim olunub.

S.Xankişiyeva

 

OXUCULARIN SEÇİMİ
REDAKSİYANIN SEÇİMİ
Siyasət BÖLMƏSİNDƏN DİQƏR XƏBƏRLƏR

SON XƏBƏRLƏR

yuxarı
Materiallardan istifadə edərkən sayta mütləq istinad olunmalıdır.

© Copyright 2007-2020 "The First News" İnformasiya Agentliyi,,
Bütün hüquqlar qorunur
entonee.net