1news.az

Pandemiya xəstəxanasının həkimi: Elm adamları təhlükəsiz peyvənd yaratmaq üçün mübarizə apararkən özümüzü və yaxınlarımızı qorumalıyıq

2 Dekabr saat 16:18 ~ 3 dəqiqəlik oxu 2460
Pandemiya xəstəxanasının həkimi: Elm adamları təhlükəsiz peyvənd yaratmaq üçün mübarizə apararkən özümüzü və yaxınlarımızı qorumalıyıq

Ümumdünya Səhiyyə Təşkilatının (ÜST) yay proqnozları özünü doğrultdu və payızın gəlməsi ilə dünyada, o cümlədən ölkəmizdə yeni COVID-19 virusuna yoluxma sayı xeyli artdı. Son günlər infeksiyaya 4 mindən çox yeni yoluxma qeydə alınır, ölüm sayı isə gündəlik olaraq artır.

1news.az hazırda yalnız pandemiya xəstəxanası kimi fəaliyyət göstərən Mərkəzi Gömrük Hospitalının həkimi, terapevt Xumar Novruzova ilə söhbət etdi. O, COVID-19 virusuna yoluxma sayının kəskin artmasının səbəbləri barədə danışmaqla yanaşı, virusdan qorunmağın yollarını göstərdi, eyni zamanda karantin tədbirlərinin sərtləşdirilməsinin zəruriliyi barədə fikirlərini bildirdi:

“Gəlin ilk sualı cavablandırmağa çalışaq - xəstələrin sayında bu qədər ciddi artımın səbəbi nədir? Bizdən asılı olmayan bir neçə amil var - bu soyuq hava dövrünün başlanğıcı, immunitetin zəifləməsi, kəskin tənəffüs xəstəlikləri və qrip mövsümünün olmasıdır. Eyni zamanda təsir edə biləcəyimiz səbəblər də var. Bunlar infeksiyaya qarşı qoruyucu tədbirlərdir. Həqiqətən, sərt karantin dövründə yoluxma kəskin şəkildə azaldı. Yəni, ziyafətlər təşkil etmirsinizsə, ziyarətə və izdihamlı yerlərə getmirsinizsə, əsas gigiyena qaydalarına riayət edirsinizsə, maska taxırsınızsa və tez-tez əllərinizi yuyursunuzsa – bütün bunlar yoluxmanın azalmasına səbəb ola bilər”.

X.Novruzovaya görə, gənclərin xəstəliyi simptimsuz keçirsələr də, yaşlı valideynləri üçün virus daşıyıcısı olurlar:

“Hətta belə bir şüar var: “Nənənizi qoruyun!” Əlbəttə ki, babanızı da. Axı onlar bu kədərli zəncirdə ən həssas halqadırlar.

Bəzi alimlərin belə bir fikri də var ki, əhalinin 60% -i xəstələnsə və ya onlara peyvənd vurulsa xəstəlik geri çəkiləcək. Bəlkə də belədir. Ancaq gəlin reanimasiya şöbələrindəki xəstələrdən və ya sevdiyi birini uğursuz virusdan itirənlərdən soruşaq, xəyali immunitet naminə xəstələnmək istərdinizmi? Axı COVID-19-a qarşı immunitetin çox qısa ömürlü olduğu məlumdur. Təkrarlanan və olduqca ciddi yoluxma halları məlumdur”.

X.Novruzova qeyd edir ki, həkimlər xəstələrin taleyi və sağlamlığı ilə oynaya bilməzlər. Bu gün həkimlər və tibb bacıları çox gərgin işləyirlər, xəstəxanalar, poliklinikalar dolub, təcili yardım maşınları çağırışlara getməkdə çətinlik çəkirlər. Ancaq ruhdan düşmürük. Virus hələ geri çəkilməyi düşünməsə də.

“Nə etməli?” sualını da cavablandıran həkim, virusdan qorunmağın öz əlimizdə olduğunu söyləyib:

“Alimlər təhlükəsiz bir peyvənd yaratmaq üçün mübarizə apararkən, özümüzü və yaxınlarımızı qorumalıyıq. Sərt karantin tədbirlərinin həm hökumətin, həm də ayrı-ayrı vətəndaşların maliyyə imkanlarını vurmasına baxmayaraq, hazırda məhdudlaşdırıcı tədbirlər bu bəlaya qarşı mübarizədə ən təsirli metodlardan biridir. Beləliklə, gəlin ağ xalatlı insanlara bizi və yaxınlarımızı xilas etməkdə kömək edək. Birlikdə daha güclüyük”.

Leyla Məmmədova

OXUCULARIN SEÇİMİ
REDAKSİYANIN SEÇİMİ
Cəmiyyət BÖLMƏSİNDƏN DİQƏR XƏBƏRLƏR

SON XƏBƏRLƏR

yuxarı
Materiallardan istifadə edərkən sayta mütləq istinad olunmalıdır.

© Copyright 2007-2021 "The First News" İnformasiya Agentliyi,,
Bütün hüquqlar qorunur
entonee.net