Azərbaycanda daha dörd bankın lisenziyası ləğv olunub - YENİLƏNİB

İyulun 21-də Maliyyə Bazarlarına Nəzarət Palatasının (MBNP) Direktorlar Şurasının qərarına əsasən, dörd bankın lisenziyası ləğv edilib.

1news.az-ın verdiyi xəbərə görə, bu barədə MBNP-nin Direktorlar Şurasının sədri Rüfət Aslanlı bu gün keçirdiyi mətbuat konfransında bildirib ki, Palatanın qərarı ilə “Dekabank” ASC, “Kredobank” ASC, “Parabank” ASC və “Zaminbank” ASC-nin lisenziyaları ləğv olunub.

“Palata bu qərarını həmin bankların aktivlərini qanunvericiliklə tələb olunan qaydada təsnifləşdirmədiklərinə, mümkün zərərlər üzrə adekvat ehtiyatlar yaratmadıqlarına, məcmu kapitalın minimum məbləği tələbinə əməl etmədiklərinə, təhrif edilmiş hesabatları təqdim etdiklərinə, bütövlükdə cari fəaliyyətlərini etibarlı və prudensial qaydada idarə etmədiklərinə, eləcə də nəzarət orqanının verdiyi yazılı göstərişləri yerinə yetirmədiklərinə görə qəbul edib”, - R.Aslanlı bildirib.

Palata rəhbəri 22 iyul tarixdən lisenziyaları ləğv olunmuş banklara MBNP tərəfindən müvəqqəti inzibatçı təyin edilməsini də qeyd edib.

Bundan əlavə, Palata sözügedən banklara ləğvedicinin təyin edilməsi barədə məhkəməyə müraciət edib və bu bankların gələcəkdə ləğvi MBNP-nın nəzarəti altında aparılacaq.

R.Aslanlı qeyd edib ki, adıçəkilən bütün dörd bank Əmanətlərin Sığortalanması Fondunun (ADİF) üzvdür və əhalinin bu banklarda olan qorunan əmanətləri fond tərəfindən ödəniləcək:

“Qərar problemli və adekvat kapitallaşmamış bankların sistemdən kənarlaşdırılması vasitəsilə bank sektorunda risklərin azaldılması, maliyyə dayanıqlığının gücləndirilməsi, etimadın artırılması və bütövlükdə maliyyə sektorunun inkişafına istiqamətlənib”.

Qeyd edək ki, cari ildə Mərkəzi Bank tərəfindən 5 bankın - United Credit Bank, Bank of Azerbaijan, Gəncəbank, Qafqaz İnkişaf Bankı və AtraBank-ın lisenziyası geri çağırılıb.

Beləliklə, hazırda bank fəaliyyətlərini davam etdirmək üçün 33 bank lisenziyaya sahibdir.

1news.az