Azad Rəhimov Azərbaycanla Çexiya arasında əlaqələrin inkişafını müzakirə edib
Çexiyada rəsmi səfərdə olan gənclər və idman naziri Azad Rəhimov bu ölkənin təhsil, gənclər və idman naziri xanım Katerina Volaxova ilə görüşüb.
Sportbox.az-ın məlumatına görə, Çexiya Parlamentinin binasında baş tutan görüşdə çexiyalı nazir A.Rəhimovu salamladıqdan sonra, Avropa oyunlarının ölkəmizdə yüksək səviyyədə təşkil edilməsi münasibəti ilə təbrik edib.
Hər iki ölkənin naziri öz ölkələrinin idman və gənclər siyasəti, bu sahələrdə həyata keçirilən layihələr haqda geniş məlumat verib, tədbirlərdə azərbaycanlı və çexiyalı gənclərin iştirakını yüksək qiymətləndirib, bu istiqamətdə əməkdaşlığın daha da möhkəmlənməsinin önəmini vurğulayıblar.
Nazir K.Volaxova görüş çərçivəsində xüsusi olaraq Avropa İttifaqının təsis etdiyi Vişeqrad sazişi və Şərq Tərəfdaşlığı Proqramı çərçivəsində ölkənizin fəaliyyətini yüksək qiymətləndirdiyini bildirib və əməkdaşlıq üçün Azərbaycana təşəkkür eedib.
Görüşün sonunda A.Rəhimov və K.Volaxova daha sıx əməkdaşlıq istiqamətində yeni layihələrin işlənib hazırlanmasının zərurətini vurğulayıblar.
Qeyd edək ki, A.Rəhimov Çexiyaya Praqa şəhərində keçirilən Avropa Olimpiya Komitəsinin 44- cü Baş Assambleyası və İcraiyyə Komitəsinin iclaslarında iştirak etmək üçün yollanıb.
Sportbox.az
