Qurban Qurbanov: Rəqibin 7 oyunçusunun Bakıya gəlməməsi bizə üstünlük vermir
Yaxşı komandaya qarşı oynayacağıq. Hər iki komanda üçün çox önəmli oyundur.
1news.az-ın Sportbox.az-a istinadən verdiyi xəbərə görə, bunu Avropa Liqasının qrup mərhələsinin V turu çərçivəsində “Tottenhem”lə qarşılaşacaq “Qarabağ” klubunun baş məşqçisi Qurban Qurbanov deyib:
“Düzgün və səhvsiz oynamalıyıq. Bunun üzərində çalışmışıq. Futbolçularımın özlərini yaxşı tərəfdən göstərəcəklərinə inanıram. Üzərlərinə düşən məsuliyyəti dərk edirlər. Yaxşı nəticə qazanmaq üçün əlimizdən gələni edəcəyik.
Rəqibin 7 oyunçusunun Bakıya gəlməməsi bizə üstünlük vermir. Əksinə, rəqibin heyətində ehtiyat oyunçular olanda daha istəkli komandaya qarşı oynamalı oluruq. Nəzərə almaq lazımdır ki, rəqibin heyətində çox güclü futbolçular var”.
Baş məşqçi komandanın kapitanı Rəşad Sadıqovun oynayıb oynamayacağı ilə bağlı sualı da cavablandırıb:
“Heyətdə ciddi dəyişiklik etməyəcəyik. Rəşad Sadıqovun oynayıb oynamaması isə sabah həkim müayinəsindən sonra məlum olacaq. Ancaq oynamaq ehtimalı böyükdür”.
1news.az
