IDEA İctimai Birliyi küçə itləri ilə bağlı paytaxt sakinləri arasında sorğu keçirib – FOTO

IDEA İctimai Birliyi Bakı sakinlərinin itlərə münasibəti və şəhərimizdəki küçə itləri ilə bağlı sorğu keçirib.

1news.az-ın məlumatına görə, Bakının fəvvarələr meydanı və Park Bulvar alış-veriş mərkəzində keçirilən sorğuda 1500-ə qədər respondent iştirak edib.

İki həftə davam edəcək həmin sorğu Bakının Yasamal, Binəqədi, Nizami, Xəzər, Nərimanov və Nəsimi rayonları ərazisində də aparılır.

Qeyd edək ki, sorğu ölkədə sahibsiz ev heyvanlarının sayının tənzimlənməsi üzrə IDEA İctimai Birliyi tərəfindən həyata keçirilən çoxşaxəli layihənin tərkib hissəsidir.

Məlum olduğu kimi, 2014-cü ilin oktyabr ayında Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyeva tərəfindən Qaradağ rayonu ərazisində sahibsiz heyvanlar üçün qayğı mərkəzinin təməli qoyulub. 

Hazırda inşa edilən həmin mərkəzin yaradılması ilə yanaşı, layihə çərçivəsində həmçinin ölkədə sahibsiz it və pişiklərin çoxalması probleminin araşdırılması, o cümlədən müvafiq  sorğuların keçirilməsi planlaşdırılır.

1news.az