Rusiyanın ATƏT yanında daimi nümayəndəsi Qarabağ münaqişəsində tərəflərdən birini müdafiə etmək cəhdini destruktiv adlandırıb
Türkiyənin təklif etdiyi kimi Qarabağ münaqişəsində tərəflərdən birini müdafiə etmək cəhdi destruktivdir, bunu Rusiyanın ATƏT yanında daimi nümayəndəsi Aleksandr Lukaşeviç bəyan edib.
1news.az İnterfax-a istinadla xəbər verir ki, bu sözləri Rusiyanın ATƏT yanında daimi nümayəndəsi Aleksandr Lukaşeviç “Rossiya 24” telekanalına müsahibəsində deyib. O, Türkiyənin Dağlıq Qarabağ münaqişəsinə dair son bəyanatını dağıdıcı adlandırıb.
Bundan əvvəl Türkiyənin Baş naziri Əhməd Davudoğlu Bakıya səfəri zamanı bəyan edib ki, Ankara işğal edilmiş ərazilərin Azərbaycana qaytarılması üçün əlindən gələni edəcək.
"Dağlıq Qarabağ münaqişəsində tərəflərdən birini müdafiə etmək cəhdi destruktivdir və bunun heç bir davamı ola bilməz"- deyə Aleksandr Lukaşeviç bildirib.
Türkiyənin Qarabağ məsələsində Azərbaycanı dəstəkləyən bəyanatlar verməsi yeni deyil və rəsmi Ankara hər fürsətdə belə bəyanatlar verir. Lakin ilk dəfədir ki, rəsmi Moskva açıq şəkildə Türkiyənin bu məzmunlu bəyanatlarına qarşı çıxaraq onu "destruktiv" adlandırır.
Rusiyanın ATƏT yanında daimi nümayəndəsi Aleksandr Lukaşeviç:
“Ümid edirəm ki, dekabrda Ermənistan və Azərbaycan prezidentlərinin görüşü gərginliyin aradan qaldırılması istiqamətinə münaqişənin həllinə öz töhfəsini verəcək”.
1news.az
