Kəmaləddin Heydərov: “Neft platformasında baş verən yanğın yaxın zamanda söndürüləcək”
“Günəşli” yatağının 10 nömrəli dərin dəniz özülündəki yanğın yaxın vaxtlarda söndürüləcək. Artıq neft quyularından birindəki yanğın söndürülüb, digər iki qaz quyusunda yanğınsöndürmə işləri aparılır.
1news.az- xəbər verir ki, bu haqda jurnalistlərə müsahibəsində Azərbaycan Respublikasının fövqəladə hallar naziri, general-polkovnik Kəmaləddin Heydərov bildirib.
Nazir qeyd edib ki, cətin hava şəraitinə baxmayaraq, itkin düşən neftçilərin axtarışı davam edir.
“Bundan əlavə platformanın altındakı bünövrə hissəsində baxış keçiriləcək. Bu məsələ Prezident İlham Əliyevin nəzarəti altındadır, görülən işlər haqqında daimi olaraq ona məlumat verilir. Ağır hava şəraitinə görə platformada yanğından təxliyə zamanı müəyyən çətinliklər baş verib. Lakin AR FHN hadisənin nəticələrini tam aradan qaldırılmaq üçün lazım olan bütün avadanlıqlağa malikdir.
1news.az
