Çingiz Hüseynzadə: Dopinq qalmaqalı ilə bağlı məsələ ciddi araşdırılacaq

İdmançılarımızda dopinq tapılması ilə bağlı məlumatı hələ yeni almışıq, müzakirə etməmişik.

1news.az-ın məlumatına görə, bunu jurnalistlərə açıqlamasında Milli Olimpiya Komitəsinin (MOK) vitse-prezidenti Çingiz Hüseynzadə deyib:

“Bütün dünyada bu cür qalmaqallar baş verir. Onu deyə bilərəm ki, bizim idmançılar ABŞ-da keçirilən dünya çempionatına getməzdən əvvəl dopinq analizlərini vermişdilər. Həmin vaxt cavablar təmiz çıxmışdı.

Bildiyiniz kimi, Milli Olimpiya Komitəsində anti-dopinq komissiyamız var. İdmançılar qayıtsınlar, mütəxəssislərlə birgə iclas keçirəcəyik. Ora mütləq Ağır Atletika Federasiyasının nümayəndələrini də çağıracağıq. Bu işdə məsul olan şəxslərdən baş verənlərin səbəbini soruşacağıq. Yəni, bu məsələ ciddi araşdırılacaq. Bildiyiniz kimi, bir neçə il əvvəl də belə bir problem yaranmışdı. Bu, təkrar olunmamalı idi”.

Qeyd edək ki, ağırlıqqaldırma üzrə Azərbaycan milli növbəti dopinq qalmaqalı ilə üzləşib. Məlum olduğu kimi, Silviya Angelovanın ardınca daha iki idmançımız – Valentin Xristov və Elxan Əliquluzadə dopinq-testdə “ilişib”. İdmançılarımız B probu vermək məcburiyyətində qalıblar. Əgər ikinci analiz də müsbət nəticələnərsə, hər üç atletimiz podiumdan ömürlük uzaqlaşdırılacaq.

1news.az