“BakuBus” MMC yeni formatda veb-saytını istifadəyə verib
Dekabrın 29-da “BakuBus” MMC-nin yeni veb-saytının təqdimatı keçirilib.
1news.az-ın AZƏRTAC-a istinadla verdiyi xəbərə gör, yeni formatda təqdim olunan veb-sayt artıq vətəndaşların istifadəsinə verilib. Saytın ən diqqət çəkən məqamı veb-sayta giriş edərkən ilkin olaraq Bakının xəritəsi və hərəkət edən avtobusların qrafikinin göstərilməsidir. Sərnişin avtobusun marşrut xətti, pik saatlarda hər hansı bir məqamla bağlı sualını “BakuBus”un veb-saytına daxil olaraq marşrut nömrəsini qeyd etməklə cavab tapa bilər.
Bundan əlavə sərnişin hansısa səbəbdən istifadə etdiyi avtobus haqda məlumat almaq, sürücünün kimliyini, avtobusun nömrəsini və hal-hazırda hansı istiqamətdə olduğunu bilmək istərsə “BakuBus”a məxsus veb-sayta daxil olub xəritədə həmin məlumatı çox asanlıqla əldə edə bilər.
Həmçinin, yeni marşrut xətti açıldıqda da “BakuBus” sərnişinləri bu sayt vasitəsilə avtobusların dayanacaqlarını öyrənə bilərlər.
Veb-saytda “BakuBus” MMC barəsində xəbərlər, paytaxtımızın gəzməli və görməli yerləri haqda məlumatlar, “BakıKart”, ekspress xətləri və “BakuBus” avtobuslarına “virtual tur” bölmələri mövcuddur.
1news.az
