Dünya şöhrətli Britaniya teatr tamaşaları Bakı kinoteatrlarında nümayiş olunacaq

15:22 - 03 / 01 / 2016

Bakı şəhəri, 30 dekabr 2015-ci il – British Council Azərbaycan TheatreHD layihəsi çərçivəsində dünyanın ən tanınmış teatrlarının – Kral Milli teatrı (London), “Qlobus” Şekspir teatrı (London), Kral Şekspir şirkəti (Stratford-na-Eyvone), Böyük Teatr (Moskva), Metropoliten Operanın (Nyu-York) və digər tanınmış teatrların ən məşhur tamaşalarının Bakıda kinoteatr ekranlarında nümayiş olunacağını məmnunluqla elan edir.

British Council Azərbaycan, Azərbaycan Respublikasının Mədəniyyət və Turizm Nazirliyi, Birləşmiş Krallığın Bakıdakı səfirliyi, CoolConnections şirkəti, Nizami Kino Mərkəzi və Park Cinema arasında olan birgə əməkdaşlıq nəticəsində həyata keçirilən layihə hər bir insana doğma şəhərini tərk etmədən, kinoteatr ekranlarında dünya teatrının və rəsm sənətinin şah əsərlərini görmək imkanı verəcək.

Baş rollarda dünya səviyyəli ulduzlar – Benedikt Kamberbetç, Tom Hiddlston, Reyf Fayns, Helen Mirren, Stiven Fray, Mark Stronq, Kristofer Plammer Yonas Kaufman, Cillian Anderson, Anna Netrebko, İldar Abdrazakov, Svetlana Zaxarova, Vladislav Lantratov və başqaları oynayırlar.

Bundan başqa, TheatreHD layihəsinə unikal film-sərgilər də daxildir ki, bu filmlər dünyanın ən məşhur muzeylərinə səyahət etmək və Mone, Vermeyer, Van Qoq, Rembrandt və digər görkəmli rəssamların məşhur əsərlərini detalları ilə izləmək imkanı verir.

TheatreHD nümayişləri Rusiyanın 35-dən artıq şəhərində, həmçinin Ukrayna və Qazaxıstanda həyata keçirilir. Azərbaycan tamaşaçıları TheatreHD-i cari ilin 8 dekabr tarixindən başlayaraq 30 iyun 2016-ci il tarixinədək izləyə biləcəklər.

TheatreHD layihəsi çərçivəsində növbəti tamaşalar :

- 5 yanvar tarixində, saat 19.30-da Park Cinemada (Flame Towers) Benedikt Kamberbeçin iştirakı ilə nümayiş etdirilən “Şerlok” filmi. Biletləri Park Cinemanın kassalarından əldə edə bilərsiniz, qiyməti 8 AZN-dir. Biletlərin sayı məhduddur.

- 13 yanvar tarixində, saat 19.00-da Nizami Kino Mərkəzində (Bül-bül prospekti 20) Benedikt Kamberbeçin iştirakı ilə nümayiş etdirilən Uilyam Şekspirin “Hamlet” əsəri. Biletləri Nizami kino mərkəzinin kassalarından əldə edə bilərsiniz, biletlərin qiyməti 20 AZN-dir. Biletlərin sayı məhduddur.

- 27 yanvar tarixində, saat 19.00-da Nizami Kino Mərkəzində (Bül-bül prospekti 20) nümayiş etdirilən Şarlotta Brontenin “Ceyn Eyr” əsəri. Biletləri Nizami kino mərkəzinin kassalarından əldə edə bilərsiniz, biletlərin qiyməti 20 AZN-dir. Biletlərin sayı məhduddur.

British Council Azərbaycan fürsətdən istifadə edib Azərbaycan Respublikası Mədəniyyət və Turizm Nazirliyinə, Birləşmiş Krallığın Bakıdakı səfirliyinə, CoolConnections şirkətinə, Nizami Kino Mərkəzinə və Park Cinemaya təşəkkürünü ifadə edir.