Paris: Charlie Hebdo hücumunun ildönümündə şübhəli şəxs öldürülüb

Charlie Hebdo dərgisinin redaksiyasına baş vermiş ölümcül hücumun ildönümündə paytaxt polisi bir şübhəlini güllələyib.

Şəxsin polis bölməsinə daxil olmaq cəhdi zamanı öldürüldüyü bildirilir. Fransa rəsmilərinə əsasən, hadisə vaxtı əlində bıçaq tutan şəxs "Allahu Əkbər!" qışqırıb.

Onun üzərində tellərin aşkar olunmasından sonra hadisə yerinə partlayıcı maddələr üzrə mütəxəsisslər dəvət edilib. Lakin şəxsin intiharçı qurşağı daşıması barədə şübhələr təsdiqlənməyib.

Hadisə Fransa prezidentinin Charlie Hebdo satirik dərgisinə hücumun ildönümü ilə bağlı çıxışından bir az sonra baş verib.

Parisdə keçirilən tədbir vaxtı Francois Hollande təhlükəsizlik qüvvələrinin ştatınına 5000 əməkdaşın əlavə olunacağını vəd edib.

Eyni zamanda kəşfiyyat orqanlarında daha 2 min iş yeri yaradılacaq ki, buda təhlükəsizlik qüvvələrinin gücləndirilməsi baxımından “misli görünməmiş” addım sayılır.

Ötən il Charlie Hebdo jurnalı və yəhudi supermarketinə cihadçıların həmləsi 17 adamın ölümünə bais olub.

BBC