Əfqanıstanda minaya düşən bir ailənin 11 üzvü həyatını itirib

Əfqanıstanın şimalında yerləşən Baqlan əyalətində minaya düşən bir ailənin 11 üzvü həyatını itirib. Hadisə nəticəsində yaralanan 3 uşağın vəziyyəti isə ağır qiymətləndirilir.

1news.az RİA Novosti informasiya agentliyinə istinadən verdiyi məlumata görə, insident mayın 19-da axşam saatlarında baş verib. Ailənin hərəkət etdiyi avtomobil minaya düşərək partlayıb. Yerli polis nümayəndəsinin sözlərinə görə, həlak olanlar arasında 5 azyaşlı uşaq da var.

Xatırladaq ki, son zamanlar Əfqanıstanda vəziyyət xeyli gərginləşib. Ölkənin bəzi kənd rayonlarında xeyli ərazini ələ keçirən Taliban hərəkatı böyük şəhərlər istiqamətində hücumlarını genişləndirir. Hazırda ölkədə İŞİD qruplaşmasının da təsiri artmaqdadır.

1news.az