Prezident İlham Əliyevə təbrik məktubları gəlməkdə davam edir
Albaniya Respublikasının prezidenti Buyar Nişani 28 May – Respublika günü münasibətilə Prezident İlham Əliyevə təbrik məktubu göndərib.
1news.az-ın dövlət başçısının rəsmi saytına istinadən verdiyi xəbərə görə, məktubda deyilir:
“Zati-aliləri.
Milli bayramınız - Respublika Günü münasibətilə Albaniya xalqı adından və şəxsən öz adımdan Sizə cansağlığı və xoşbəxtlik, Azərbaycan xalqına inkişaf və firavanlıq arzulamaqdan şərəf duyuram.
Bu il martın 11-də Bakıda Zati-alinizlə görüşümüzü məmnunluqla xatırlayıram. Həmin görüşdə ölkələrimiz arasındakı münasibətləri yüksək qiymətləndirərək, onları daha da möhkəmləndirmək niyyətimizi vurğulamışdıq. Əminəm ki, Sizin Albaniyaya səfəriniz ikitərəfli əlaqələrimizdə yeni, daha əlamətdar bir mərhələnin əsasını qoyacaq.
Fürsətdən istifadə edərək, Azərbaycanın və şəxsən Sizin energetika sektorunda, eləcə də TAP boru kəməri layihəsində Albaniyaya göstərdiyiniz dəyərli dəstəyə görə Zati-alinizə bir daha dərin minnətdarlığımı bildirirəm.
Zati-aliləri, xahiş edirəm, Sizə olan yüksək ehtiramımı qəbul edin”.
Qeyd edək ki, Myanma İttifaqı Respublikasının prezidenti Thin Cjo, Sloveniya Respublikasının prezidenti Borut Pahor, Portuqaliya Respublikasının prezidenti Marselo Rebelo de Susa da Prezident İlham Əliyevə oxşar təbrik məktubları ünvanlayıblar.
1news.az
