Separatçılar əcnəbilərin Dağlıq Qarabağa qeyri-qanuni səfərlərini gizlətmək üçün onların pasportlarına möhür vurmurlar

Dağlıq Qarabağ separatçıları işğal altında olan Azərbaycan ərazilərinə əcnəbilərin qeyri-qanuni səfərlərini gizlətmək üçün yeni varianta əl atıblar.

1news.az-ın telegraf.by-a istinadla verdiyi xəbərə görə, belaruslu səyyah Pavel Andreyevskinin Dağlıq Qarabağa səfəri ilə bağlı saytda dərc olunmuş yazısından aydın olur ki, erməni separatçıları artıq Dağlıq Qarabağa səfər edən əcnəbi vətəndaşların pasportlarına möhür vurmurlar.

“Əvvəllər pasporta vurulan möhürə görə, Azərbaycan şəxsin Dağlıq Qarabağa səfər etdiyini müəyyənləşdirə və asanlıqla respublika ərazisinə daxil olmasını qadağan edə bilirdi. Bunun da qanuni əsasları var. Axı Dağlıq Qarabağ rəsmi olaraq Azərbaycanın işğal olunmuş ərazisidir. Əgər Azərbaycanın möhürü olmadan həmin əraziyə səfər edirsənsə, ölkə ərazisində qanunsuz girmiş olursan. Təbii ki, bilsələr, bu cinayət üçün səni Azərbaycandan deportasiya gözləyir”.

Pavel Andreyevski yazısında Dağlıq Qarabağın gəzməli yerləri barədə məlumat verir, daha çox Şuşadan ətraflı bəhs edib.

Qeyd ki, belaruslu gənc səyyah P.Andreyevski dünya səyahətinə çıxıb. Bir ildən çoxdur ki, o, avtostoplarla dünyanı gəzir, yerli sakinlərin evlərində qalır. Daha əvvəl də Dağlıq Qarabağa getdiyi üçün onun adı ötən ilin iyununda Azərbaycan Xarici İşlər Nazirliyi tərəfindən “arzuolunmaz şəxslər” siyahısına salınıb.

1news.az