“The Daily Caller” qəzetində Kluninin Ermənistanla əlaqələri barədə məqalə dərc olunub

Amerikada çıxan “The Daily Caller” qəzetində Yaxın Şərq məsələləri üzrə ixtisaslaşan politoloq, Livan hökumətinin xarici siyasət məsələləri üzrə müşaviri Əli əl-Hüseyninin “Kluni və Ermənistan – Azərbaycana qarşı qəribə cütlük” sərlövhəli məqaləsi dərc olunub.

1news.az-ın AZƏRTAC-a istinadla verdiyi xəbərə görə, müəllif bu məqalədə vəkil Amal Kluni və onun Ermənistanla əlaqələri barədə dəlillər təqdim edir.

Əl-Hüseyni yazır ki, Amal Kluni Ermənistanın mənafelərini təmsil edir. Bu fakt özlüyündə şübhəli seçimdir, çünki Ermənistan başqa ölkədən asılı “vassal”dır. Ermənistanı idarə edən repressiv və korrupsiyaya qurşanmış hökumət 2008-ci ildə öz ölkəsinin nümayişə çıxmış vətəndaşlarının gülləbaran edilməsinə sanksiya verib. Amal Kluni Türkiyə vətəndaşının 1915-ci il hadisələri barədə ermənilərin dedikləri ilə mübahisə etmək hüququ ilə bağlı “Perinçek İsveçrəyə qarşı” işi üzrə Ermənistanın mənafelərini təmsil etmək üçün tutulmuşdur. Kluninin bu iş üzrə gətirdiyi dəlillər söz azadlığı anlayışına zidd idi.

Müəllif öz mühakimələrində Amal Kluninin hansı səbəblərə görə Xədicə İsmayılovanın işini öz üzərinə götürməsi məsələsinə şübhə ilə yanaşır. Əl-Hüseyni yazır ki, Amalın əri Corc Kluni Ermənistanın indiki prezidenti, və keçmiş səhra komandiri Serj Sarkisyanın beynəlxalq aləmdə təcrid olunması imicini yumşaltmaq üçün bu il aprel ayında Ermənistana səfər edib.

Corc Kluninin səfəri Ermənistanda rejim əleyhinə nümayişlərdən diqqəti yayındırıb. Yerevanda Azərbaycan və Türkiyə bayraqlarının açıq şəkildə yandırılması ilə başa çatmış yürüşə Kluni başçılıq edirdi.

1news.az