Azərbaycan Respublikasının Silahlı Qüvvələr Günü Pakistanda da qeyd olunub - FOTO

İslamabad şəhərinin Marriott Hotelində təşkil olunmuş mərasimdə Azərbaycan və Pakistanın dövlət himnləri səsləndirilib.

Səfirlikdən 1news.az-a verilən məlumata əsasən, Azərbaycan Respublikasının Pakistandakı səfiri Əli Əlizadə mərasimdə çıxış edərək Azərbaycan prezidenti - Silahlı Qüvvələrimizin Ali Baş Komandanı cənab İlham Əliyevin rəhbərliyi ilə orduda aparılan mütəmadi islahatlar nəticəsində Azərbaycan Silahlı Qüvvələrinin bu gün regionda ən güclü və müasir ordu olduğunu bildirib.

Ermənistanın apardığı təcavüz, etnik təmizləmə siyasəti nəticəsində Azərbaycanın 30 ilə yaxındır müharibə şəraitində olduğunu, 20 faiz torpaqlarının işğal edildiyini, Azərbaycanlıların Xocalı Soyqırımı kimi bir çox dəhşətli qətliamlar yaşadığını vurğulayaraq bu gün Azərbaycan Ordusunun döyüş hazırlığının yüksək səviyyədə olduğunu və torpaqlarımızı hər an azad etməyə qadir olduğunu diqqətə çatdırıb. Pakistan İslam Respublikasının Dağlıq Qarabağ münaqişəsində Azərbaycana göstərdiyi ədalətli və səmimi dəstəyin daim məmnunluqla qarşılandığını bildirən səfir Azərbaycan-Pakistan əlaqələrinin əbədi, sarsılmaz və möhkəm olduğunu bildirib.

Azərbaycanın Silahlı Qüvvələrinin Pakistandakı hərbi attaşesi polkovnik  Mehman Novruzov mərasimdə çıxış edərək Silahlı Qüvvələrimizin yaranma tarixindən və inkişaf yolundan danışıb. O, müasir silahlarla silahlanmış, peşəkar və vətənpərvər kadrlardan ibarət olan Azərbaycan Silahlı Qüvvələrinin güclü ordu olduğunu qeyd edib.

O, Silahlı Qüvvələrimizin Ermənistanın aprel ayının əvvəlində törətdiyi təxribatlara cavab olaraq əks-hücuma keçməsi və qısa müddət ərzində düşmənin müdafiə xəttini yararaq 20 ildən artıq düşmən işğalında olan torpaqlarımızın azad etməsini nümunə gətirməklə, ordumuzun yüksək döyüş qabiliyyətinin olduğunu və qarşıya qoyulmuş tapşırıqları tam yerinə yetirməyə qadir olduğunu qeyd edib. Azərbaycanla Pakistan arasında yüksək səviyyəli münasibətlərin olduğunu qeyd edən polkovnik M.Novruzov, bu əlaqələrin hərbi sahəni də əhatə etdiyini, Azərbaycan-Pakistan silahlı qüvvələri arasında əməkdaşlığın ildən-ilə daha da dinamik inkişaf etdiyini və əməkdaşlıq sahələrinin genişləndiyini diqqətə çatdırıb.

İftar süfrəsinin də təşkil olunduğu mərasimdə Azərbaycanın və Azərbaycan Silahlı Qüvvələrinin inkişafını, Silahlı Qüvvələrimizin hazırkı döyüş qabiliyyətini, maddi-texniki bazasını əks etdirən video çarx və fotoşəkillər nümayiş olunub.

1news.az