Fuad Muradovun rəhbərlik etdiyi nümayəndə heyəti Qərb bölgəsində görüşlər keçirib - FOTO
Milli Məclisin Gənclər və İdman Komitəsinin sədri Fuad Muradov və Komitənin üzvləri Qərb bölgəsində səfərdə olub.
1news.az xəbər verir ki, Tovuzda “Beynəlxalq Heydər Əliyev kuboku” uğrunda kidboksinq yarışlarını izləyən Fuad Muradov, Komitənin üzvləri Adil Əliyev, Şahin İsmayılov, Təbii ehtiyatlar, energetika və ekologiya komitəsinin sədr müavini, deputat Kamran Nəbizadə, daha sonra mükafatlandırma mərasimində iştirak ediblər.
Nümayəndə heyəti yarışdan sonra Qazax rayonunda 200-də çox gənclə görüşüblər. Qazax Rayon İcra Hakimiyyətinin başçısı Rəcəb Babaşov tədbirdə çıxış edərək belə görüşlərin gənclərin inkişafına xidmət etdiyini deyib.
Fuad Muradov isə çıxışında gənclərlə bağlı qəbul olunan qərarların, verilən sərəncamların Azərbaycan gəncinin cəmiyyətdə yüksək mövqe tutmasına xidmət edir. Millət vəkili deyib ki, Milli Məclisin Gənclər və İdman Komitəsinin də yaradılması bu istiqamətdə həyata keçirilən tədbirlərin sürətli davam etdiriləməsinə hesablanıb.
Tədbirdə müzakirələr zamanı gənclər özləri üçün xarici dil kurslarının, kitab klublarının yaradılması və ya genişləndirilməsi, hərbi vətənpərvərlik məsələləri ilə bağlı layihələrin daha çox icra edilməsi üçün şəraitin yaradılması istiqamətində təkliflərlə çıxış ediblər. Görüş Komitə üzvləri gəncləri maraqlandıran sualların cavablandırması ilə yekunlaşıb.
Nümayəndə heyəti həmçinin, Qazaxın Ermənistan silahi qüvvələri ilə ən yaxın təmas xəttində yerləşən Məzəm kəndində olublar. Kənd sakinləri ilə görüşən millət vəkilləri onları narahat edən məsələlərlə tanış olublar. Bildirilib ki, Ermənistan tərəfi tez-tez dinc əhalini atəşə tutur və nəticədə əhaliyə ziyan dəyir. Eyni zamanda dinc sakinlər yaralanır, öldürülürlər. Lakin bununla belə kənd sakinləri heç də qorxmadıqlarını bildiriblər. Qeyd edilib ki, kənddə həyata keçirilən müxtəlif infrastruktur layihələri onların həyat səviyyələrinin daha da yaxşılaşdırılmasına xidmət edir.
1news.az
