Rusiya və Türkiyə ilin sonunadək ticarət əməkdaşlığına dair proqram hazırlayacaqlar
Rusiya və Türkiyə 2019-cu ilədək dövrü əhatə edəcək ticarət əməkdaşlığına dair proqramı bu ilin sonunadək hazırlayıb başa çatdıracaqlar.
Bunu Rusiyanın iqtisadi inkişaf naziri Aleksey Ulyukayev deyib.
“Strateji məsələlərin həlli məqsədilə 2019-cu ilədək dövrü əhatə edəcək iqtisadi-ticarət, elmi-texniki və mədəni əlaqələr proqramını tezliklə hazırlayıb başa çatdırmaq qərara alınıb. Biz türkiyəli həmkarlarımızla ilin sonunadək bu işləri yekunlaşdırmaq və proqramı imzalamağa hazırlamaq niyyətindədik”, - deyə Ulyukayev Rusiya və Türkiyənin işgüzar dairələrinin görüşündə bildirib.
“Biz xidmətlərin alqı-satqısı, investisiya, ticarət sahəsində liberallaşdırılmaya dair sazişin əldə olunması istiqamətində işlərin bərpa olunmasına böyük əhəmiyyət veririk”, - deyə nazir qeyd edib.
Onun sözlərinə görə, sentyabrın əvvəlində məsələ ilə əlaqədar məsləhətləşmələrin aparılması nəzərdə tutulub.
RİA Novosti
