Bu il Bakıda 10 minə yaxın cinayət qeydə alınıb
Bu il Bakıda qeydə alınan cinayətlərin statistikası açıqlanıb.
1news.az-ın xəbərinə görə, Bakı şəhər Baş Polis İdarəsində bu gün keçirilən əməliyyat müşavirəsində qeyd olunub ki, 2016-cı ilin 9 ayı ərzində paytaxtda 9,137 (ötən ilin müvafiq dövründə 8,706) cinayət qeydə alınıb.
Onların 82,7 faizi az ağır və böyük ictimai təhlükə törətməyən, 17,3 faizi isə ağır və xüsusilə ağır növlər olub. 2015-ci ilin eyni dövrü ilə müqayisədə qəsdən adam öldürmə halları 15,8 faiz, qəsdən sağlamlığa ağır zərər vurma halları 14 faiz azalıb.
Cinayətlərin 78,5 faizinin (ötən ilin müvafiq dövründə 75,9 faiz), ağır növlərinin 78,1 faizinin (77,9 faiz), qeyri-aşkar şəraitdə baş verənlərin 67,8 faizinin (64,7 faiz) açılması təmin olunub. Şəxsiyyət əleyhinə olan 1.314 cinayətdən 95,7 faizi (92,3 faiz), o cümlədən qəsdən adam öldürmə hallarının 98 faizi, adam öldürməyə cəhdlərin 100 faizi açılıb.
Ötən ilin eyni dövrü ilə müqayisədə ümumi cinayətlərin açılması 2,6 faiz, onların ağır və xüsusilə ağır növlərinin açılması 0,2 faiz, şəxsiyyət əleyhinə olanların açılması 3,4 faiz, o cümlədən adam öldürməyə cəhdlərin açılması 10,5 faiz, zorlama hallarının açılması 14,3 faiz, mülkiyyət əleyhinə olan cinayətlərin açılması 5,1 faiz, o cümlədən dövlət və ya bələdiyyə əmlakı oğurluqlarının açılması 26,4 faiz, mənzillərdən edilən oğurluqların açılması 10,6 faiz, mal-qara oğurluğunun açılması 25,2 faiz, mənimsəmə və israf etmə cinayətlərinin açılması 9,7 faiz, soyğunçuluqların açılması 11,6 faiz, quldurluqların açılması 3,5 faiz, dələduzluqların açılması 0,8 faiz, hədə-qorxu ilə tələb etmələrin açılması 10,2 faiz, xuliqanlıq hallarının açılması isə 5,2 faiz yaxşılaşıb.
Qeyd olunub ki, “Təhlükəsiz şəhər” xidmətinin operatorları tərəfindən 2,692 hadisə aşkarlanıb, kameraların arxiv görüntülərindən istifadə edilməklə 214 bağlı cinayət açılıb.
Hesabat dövründə 61 soyğunçuluq və quldurluq cinayəti törətmiş 112 nəfərdən ibarət 54 qrup, eləcə də mənzillərdən 249 oğurluq törətmiş 121 nəfərdən ibarət 47 cinayətkar qrup ifşa olunub. Bununla yanaşı, təqsirləndirilən şəxs qismində axtarışda olan 1402 nəfərdən 69 faizi, ağır və xüsusilə ağır cinayətlərə görə axtarılan 553 nəfərdən isə 53 faizi tutulub.
Narkotiklərlə bağlı aşkar edilmiş 973 (1074) fakt üzrə qanunsuz dövriyyədən 235 kq-dan çox (+8 kq 817 qr) narkotik vasitə çıxarılıb. 96 odlu silah, 9 qumbara, 8.872 ədəd döyüş patronu yığılıb, əməliyyat yolu ilə qanunsuz saxlanılan və gəzdirilən 47 odlu silah götürülüb.
1news.az
