Putin, Merkel və Olland Ərdoğana başsağlığı veriblər
Rusiya prezidenti Vladimir Putin İstanbulda törədilən terror aktı ilə əlaqədar olaraq türkiyəli həmkarı Rəcəb Tayyib Ərdoğana başsağlığı verib.
1news.az-ın məlumatına görə, bu barədə Kremlin mətbuat xidməti məlumat yayıb.
“Yeni il gecəsində dinc sakinlərin qətlə yetirilməsi qədər alçaq bir cinayəti təsəvvür etmək çətindir. Lakin terrorçular üçün insan əxlaqı tamamilə yad anlayışdır. Bizim ümumi vəzifəmiz terror təcavüzünə qətiyyətli cavab verməkdir”- deyə, Putin qeyd edib.
Rusiya prezidenti ölkəsinin terrorla mübarizədə Türkiyənin etibarlı tərəfdaşı olaraq qalacağını da sözlərinə əlavə edib.
Bundan başqa Almaniyanın kansleri Angela Merkel və Fransa prezidenti Fransua Olland da türkiyəli həmkarlarına başsağlığı məktubu göndəriblər. Onlar Türkiyədə törədilmiş terror aktını qınamaqla yanaşı, Türkiyə xalqına dəstək olduqlarını bildiriblər.
Qeyd edək ki, bu gecə yerli vaxtla saat 01.15 (Bakı vaxtı ilə 02.15) radələrində Santa Klaus geyimli naməlum silahlı İstanbuldakı “Reina” gecə klubuna yaxınlaşaraq, girişdə duran polis əməkdaşını və mülki şəxsi qətlə yetirib, sonra isə içəri daxil olaraq oradakı insanlara atəş açıb. Hücum zamanı gecə klubunda Yeni il bayramını qeyd edən 600-dək insan olub. Nəticədə 39 nəfər ölüb, 69 nəfər isə yaralı var.
1news.az
