İzmirin məhkəmə binasında dünənki terror qurbanları ilə vida mərasimi keçirilib – FOTO

Bu gün İzmirin məhkəmə binasında dünən baş vermiş terror qurbanları ilə vida mərasimi keçirilib. Terror zamanı polis zabiti Fethi Sekin və ədliyyə işçisi Musa Can həyatlarını itirb, 10 nəfər isə yaralanıb.

Mərasimə terror qurbanlarını anmaq üçün minlərlə insan gəlib. Həmçinin buraya Türkiyənin ədliyyə naziri Bəkir Bozdağ, millət vəkilləri, ədliyyə orqanları işçiləri, eləcə də sadə vətəndaşlar da gəlib.

Anma mərasimi şəhidləri bir dəqiqəlik sükutla yad etməklə başlayıb. Eləcə də Türkiyənin dövlət himni səsləndirilib.

Terrorçularla qəhrəmancasına döyüşən polis Fethi Sekinin cənazəsi Türkiyə bayrağına bürünüb. Şəhid son mənzilə alqış sədaları altında yola salınıb.

Toplaşanlar “Şəhidlər ölməz, Vətən bölünməz!” – şüarını səsləndirib.

“Şəhidlərimiz qarşısında baş əyirəm. Onlar Vətən uğrunda canlarını fəda edərək şəhidlik zirvəsinə yüksəldilər. Bu, yalnız İzmirin ədalət sarayına, burada çalışanlara qarşı hücum deyildi. Bu, bütün Türkiyəyə qarşı hücum idi. Terrorun kökünü kəsənədək onunla mübarizə aparacağıq”, - deyə B.Bozdağ bildirib. 

CNN Türk