“Emosional və ünsiyyət pozuntuları” mövzusunda treninq keçirilib
Avropa İttifaqının maliyyə dəstəyi ilə keçirilən “Azərbaycanda yuvenal ədliyyə islahatı məqsədilə uşaq psixi sağlamlığı üzrə müasir xidmətlərin sınaqdan keçirilməsi” layihəsi çərçivəsində AR Səhiyyə Nazirliyinin Psixi Sağlamlıq Mərkəzində 16-20 yanvar 2017-ci il tarixlərdə beşgünlük treninq həyata keçirilib.
“Emosional və ünsiyyət pozuntuları” mövzusunda keçirilmiş treninqin məqsədi layihə çərçivəsində yaradılmış “Ailə Yardım Mərkəzi”nin komandasına spesifik biliklərin təqdim edilməsidir. Treninq xarici mütəxəssislər - “Psixiatriyada Qlobal Təşəbbüs” - Tbilisi təşkilatının əməkdaşları Nino Maxaşvili və Cana Cavaxişvili tərəfindən təqdim edilib.
Treninq nəticəsində əldə edilmiş bilik və vərdişlər ehtiyacı olan ailələrə zəruri xidmətlərin göstərilməsinə yönəlib. Bu, xüsusilə autizm spektrli xəstəliklərdən əziyyət çəkən uşaq və onların valideynlərinə yönəlib və təhlükəli davranış problemlərinin qarşısının alınmasında mühüm əhəmiyyət kəsb edir.
Qeyd edək ki, layihə Avropa İttifaqı tərəfindən maliyyələşdirilən və BMT İnkişaf Proqramı tərəfindən həyata keçirilən “Həssas əhali qruplarının sosial-iqtisadi hüquqlarının təmin edilməsində vətəndaş cəmiyyətinin rolunun gücləndirilməsi” layihəsi çərçivəsində İnkişaf NaminəTəşəbbüs İctimai Birliyi tərəfindən icra olunur. Layihənin xarici partnyoru isə dünyada geniş tanınmış “Psixiatriyada Qlobal Təşəbbüs” İctimai Birliyinin Gürcüstan nümayəndəliyidir.
1news.az
