Fuad Ələsgərov: “Respublikamızda ictimai-siyasi sabitliyin qorunmasında daxili işlər orqanları əməkdaşları önəmli rol oynayıblar”
“Aidiyyatı Dövlət Proqramlarından, Milli Fəaliyyət Planlarından irəli gələn vəzifələr yüksək səviyyədə icra olunub, cinayətkarlıqla mübarizə, ictimai təklükəsizliyin təmini sahələrində bir sıra uğurlar qazanılıb”.
1news.az xəbər verir ki, bu sözləri Prezident Administrasiyasının Hüquq-Mühafizə Orqanları ilə İş Şöbəsinin müdiri Fuad Ələsgərov Daxili İşlər Nazirliyinin ötən ilin yekunlarına həsr olunmuş Kollegiya iclasında bildirib.
O çıxış edərək Azərbaycan Respublikasının Prezidenti Zati-aliləri cənab İlham Əliyevin rəhbərliyi ilə ölkəmizdə hüquqi-demokratik islahatların, böyük infrastruktur layihələrinin və sosial yönümlü proqramların uğurla həyata keçirildiyini diqqətə çatdırıb.
F.Ələsgərov qeyd edib ki, respublikamızda ictimai-siyasi sabitliyin, habelə, insan və vətəndaş hüquq və azadlıqlarının qorunmasında daxili işlər orqanları əməkdaşları önəmli rol oynayıblar.
Adminstrasiya rəsmisi xidməti fəaliyyətin təkmilləşdirilməsi üçün qanunvericiliyə edilən dəyişikliklərin əhəmiyyəti, yeni informasiya texnologiyalarının tətbiqinin daha geniş şəkildə istifadəsinin vacibliyini də nəzər çatdırıb.
1news.az
