Azərbaycanın baş konsulu MDB Parlamentlərarası Assambleyasında görüşdə iştirak edib
Sankt-Peterburqda Müstəqil Dövlətlər Birliyinin (MDB) iştirakçısı olan ölkələrin Parlamentlərarası Assambleya Şurası Katibliyinin rəhbərlərinin Birlik ölkələrinin Rusiyanın Şimal paytaxtında akkreditə olunmuş səfir və konsulları ilə görüşü keçirilib.
Azərbaycanın Sankt-Peterburqdakı baş konsulluğunun mətbuat xidmətindən bildiriblər ki, görüşdə Azərbaycanın Sankt-Peterburqdakı baş konsulu Sultan Qasımov, MDB PA Şurasının baş katibinin müavini – Azərbaycan Milli Məclisinin MDB PA-da nümayəndəsi Aydın Cəfərov və vitse-konsul Elçin Məmmədov da iştirak ediblər.
MDB PA Şurasının baş katibi – MDB PA Şurası Katibliyinin rəhbəri Aleksey Sergeyev diplomatik missiyaların nümayəndələri, habelə Rusiya Xarici İşlər Nazirliyinin və Sankt-Peterburq Hökumətinin təmsilçiləri ilə görüşün əhəmiyyətini vurğulayaraq qeyd edib ki, yüksək vəzifəli həmkarların Parlamentlərarası Assambleyanın fəaliyyətinə diqqətlə yanaşması və tədbirlərə qatılması MDB PA-nın nüfuzunu təsdiq edir, qurumun fəaliyyətinin səmərəliliyinin artdığını göstərir. O deyib: “Biz əvvəlki kimi hesab edirik ki, parlamentlərarası əlaqələr məkanına çevrilən MDB ölkələrinin Parlamentlərarası Assambleyası sülhün və sabitliyin dəstəklənməsində, humanitar əməkdaşlığın inkişafında mühüm rol oynayır”.
MDB PA Şurasının baş katibi qarşıdan gələn tədbirlər – martın 27-28-də keçiriləcək yubiley sessiyası, VIII Neva Beynəlxalq ekoloji konqresi, habelə əsas tədbirləri 2017-ci ilin oktyabrında Tavriya Sarayında keçiriləcək Parlamentlərarası İttifaqın 137-ci Assambleyası barədə məlumat verib.
Baş konsul Sultan Qasımov da ölkələrimiz arasında əlaqələri intensiv möhkəmləndirən və inkişaf etdirən belə görüşlərin əhəmiyyətini və səmərəliliyini qeyd edib.
AZƏRTAC
