Elmar Məmmədyarov: Latviya bizim yaxın və ciddi tərəfdaşımızdır
Azərbaycan və Latviya arasında qarşılıqlı əlaqələr strateji xarakter daşıyır. Bu xüsusda, Latviya bizim yaxın və ciddi tərəfdaşımızdır. Zənnimizcə, bu il iki ölkə arasında yüksək səviyyəli səfərlərin mübadiləsi baş tutacaq.
1news.az-ın məlumatına görə, bunu Azərbaycanın xarici işlər naziri Elmar Məmmədyarov latviyalı həmkarı Edqars Rinkeviçlə birgə keçirdiyi mətbuat konfransında deyib. Nazir E.Rinkeviçlə yalnız enerji deyil, nəqliyyat layihələri barəsində də fikir mübadiləsi apardıqlarını diqqətə çatdırıb:
“Latviya tərəfinin təşəbbüsü olan Zubr dəmiryol xətti layihəsi Baltik, Qara və Xəzər dənizlərinin birləşdirilməsini nəzərdə tutur. Şərqdən Avropaya yük daşımalarını nəzərdə tutan bu layihənin də imkanları çox genişdir. Bu layihəyə dair strategiyanın işlənilib-hazırlanması üzrə razılıq əldə etdik. Təbii ki, bu məsələdə müntəzəm təmaslar və mütəxəssislərin görüşləri çox önəmlidir”.
Latviyalı həmkarı ilə görüşdə Ermənistan-Azərbaycan münaqişəsi barəsində də danışdıqlarını deyən E.Məmmədyarov münaqişəyə dair beynəlxalq hüququn norma və prinsiplərinə əsaslanan mövqeyinə görə Latviya tərəfinə təşəkkürünü bildirib:
“Bu mövqe hətta Brüsseldə də prezident Tusk tərəfindən səsləndirilib. Avropa İttifaqı və üzv dövlətləri Azərbaycanın ərazi bütövlüyü, suverenliyi və müstəqilliyinə tam dəstəyi ifadə edib. Azərbaycanın üzləşdiyi təhdid və təhlükələri nəzərə alsaq, bu dəstək bizim üçün çox vacibdir”.
1news.az
